Xəzər Universiteti İT Departamentinin rəhbəri Fərid Musayev Azərbaycanda süni intellektin inkişaf səviyyəsi, mövcud imkanlar və qarşıda duran əsas çağırışlar barədə danışıb.

Fərid Musayev BiG.AZ-a açıqlamasında ölkədə süni intellektin inkişafını potensial və müəyyən çatışmazlıqların mövcud olduğu keçid mərhələsi kimi xarakterizə edib. Onun sözlərinə görə, bankçılıq, telekommunikasiya və elektron ticarət sahələrində süni intellekt texnologiyalarından istifadə genişlənir, lakin kiçik və orta sahibkarlıqda tətbiq hələ məhduddur.

Mütəxəssis qeyd edib ki, Azərbaycanda süni intellekt alətlərindən istifadə edən gənclərin və bu sahədə ixtisaslaşan kadrların sayı artır. Bununla yanaşı, universitetlərin tədris proqramlarının yenilənməsi, tədqiqat mərkəzlərinin yaradılması və yerli elmi araşdırmaların genişləndirilməsi vacibdir.

Fərid Musayevin fikrincə, əsas çağırışlardan biri keyfiyyətli məlumat bazalarının, xüsusilə Azərbaycan dilində süni intellekt modellərinin hazırlanması üçün geniş dil korpuslarının çatışmazlığıdır.

Ekspert vurğulayıb ki, Azərbaycanın yalnız mövcud süni intellekt texnologiyalarından istifadə etməsi kifayət deyil. Ölkənin bu sahədə rəqabət qabiliyyətini artırmaq üçün yerli texnologiyaların hazırlanmasına, tədqiqatlara və innovasiyalara daha çox diqqət yetirilməsi vacibdir.

https://big.az/594963-azerbaycanda-suni-intellekt-hansi-seviyyededir-ekspertden-aciqlama.html