Xəzər Universitetinin İT Departamentinin rəhbəri Fərid Musayev süni intellekt platformalarından, xüsusilə ChatGPT-dən istifadə zamanı şəxsi və korporativ məlumatların qorunmasının vacibliyindəm danışıb.

Fərid Musayev Demokrat.az-a açıqlamasında bildirib ki, süni intellekt sistemlərinin inkişafında insan rəyi əsasında gücləndirilmiş öyrənmə (RLHF) mexanizmindən istifadə olunur. Bu proses məlumatların emalı və məxfiliyi ilə bağlı müəyyən suallar yarada bilər.

Mütəxəssis istifadəçilərə ChatGPT kimi platformalara şəxsi məlumatlar, məxfi sənədlər, bank məlumatları, sağlamlıq tarixçəsi, şirkət sirləri və məxfi proqram kodları daxil etməməyi tövsiyə edib. Həmçinin, real ad və şirkət adlarının anonimləşdirilməsinin məqsədəuyğun olduğunu qeyd edib.

F. Musayev korporativ istifadə zamanı şirkətlər üçün nəzərdə tutulmuş süni intellekt xidmətlərindən və API əsaslı həllərdən istifadənin daha uyğun ola biləcəyini bildirib. Onun sözlərinə görə, platformaların məxfilik və məlumatların təlim məqsədilə istifadəsi ilə bağlı parametrləri əvvəlcədən yoxlanılmalıdır.

Mütəxəssis qeyd edib ki, süni intellektdən istifadə zamanı əsas prinsip təhlükəsizliyə və məxfiliyə risk yarada biləcək məlumatların paylaşılmasından əvvəl onların diqqətlə qiymətləndirilməsidir.

https://demokrat.az/news/297349/chatgpt-ile-butun-problemlerini-bolusenlere-xeberdarliq-aciqlama