Xəzər Universiteti Psixologiya departamentinin əməkdaşı, Xəzər Psixoloji Xidmət Mərkəzinin psixoloqu Mirsadiq Muxtarov 2026-cı il sentyabrın 15-də “BiG.AZ” xəbər portalına paxıllıq və qısqanclığın insan psixologiyasına təsiri ilə bağlı fikirlərini bölüşüb.

M. Muxtarov bildirib ki, paxıllıq və qısqanclıq gündəlik həyatda eyni mənada işlədilsə də, psixoloji baxımdan fərqli emosional vəziyyətlərdir. Onun sözlərinə görə, paxıllıq əsasən başqasının sahib olduğu uğur, imkan və ya xüsusiyyətlə özümüzü müqayisə etməkdən, qısqanclıq isə dəyərli münasibəti və ya mövqeni itirmək qorxusundan yaranır. Psixoloq qeyd edib ki, paxıllıq hissinin yaranması insanı avtomatik olaraq pis xarakterli etmir. Bu hiss bəzən insanın öz ehtiyacları, narazılıqları və özünəinamı ilə bağlı müəyyən məlumatlar da verə bilər. Psixoloq vurğulayıb ki, paxıllıq hissini yalnız mənfi emosiya kimi qiymətləndirməkdənsə, onun insana nə deməyə çalışdığını anlamaq daha faydalıdır.

Psixoloq sosial medianın da bu hissi gücləndirə bildiyini qeyd edib. Onun sözlərinə görə, insanlar sosial şəbəkələrdə əsasən həyatlarının nümayiş etdirmək istədikləri tərəflərini paylaşırlar və bu, başqalarının həyatının idealizə edilmiş görüntüləri ilə müqayisəyə səbəb ola bilər. M.Muxtarov əlavə edib ki, məqsəd paxıllıq hissini tamamilə aradan qaldırmaq deyil, onun səbəbini anlamaq və davranışları idarə etməkdir. Bu hiss gündəlik həyata və münasibətlərə ciddi təsir göstərdikdə isə psixoloji dəstək almaq faydalıdır.

Müsahibənin tam versiyası aşağıdakı linkdə:

https://big.az/593609-mirsadiq-muxtarov-paxilliq-hissini-menfi-emosiya-kimi-qiymetlendirmekdense-onun-bize-ne-demeye-calisdigini-anlamaq-daha-faydalidir.html