Xəzər Universitetinin İT Departamentinin rəhbəri Fərid Musayev bank kartlarından istifadə zamanı kiberdələduzluq riskləri və vətəndaşların maliyyə vəsaitlərini qoruma yolları barədə mediaya açıqlama verib.

Fərid Musayev BiG.AZ-a açıqlamasında bildirib ki, rəqəmsal ödənişlərin genişlənməsi ilə yanaşı, dələduzların istifadə etdiyi üsullar da inkişaf edir. Onun sözlərinə görə, əsas təhlükələr arasında sosial mühəndislik, fişinq, skimminq və zərərli proqramlar yer alır.

Ekspert qeyd edib ki, dələduzlar özlərini bank əməkdaşı və ya digər rəsmi qurum nümayəndəsi kimi təqdim edərək kart məlumatlarını, PIN, CVV və SMS təsdiq kodlarını əldə etməyə çalışa bilərlər. Saxta bank mesajları və internet səhifələri vasitəsilə də istifadəçilərin məlumatları ələ keçirilə bilər.

Fərid Musayev kartdan icazəsiz pul çıxarıldığı halda dərhal bankla əlaqə saxlayaraq, kartın bloklaşdırılmasını, əməliyyata etiraz edilməsini və zəruri hallarda hüquq-mühafizə orqanlarına müraciət olunmasını tövsiyə edib.

Departament  rəhbəri maliyyə təhlükəsizliyini gücləndirmək üçün kart məlumatlarının və təsdiq kodlarının paylaşılmamasını, 2FA-dan istifadəni, yalnız rəsmi bank tətbiqlərindən yararlanmağı, şübhəli linklərə daxil olmamağı və bank bildirişlərini aktiv saxlamağı tövsiyə edib.

Fərid Musayev vurğulayıb ki, dələduzların istifadə etdiyi üsullar dəyişsə də, diqqətli və ehtiyatlı davranmaq maliyyə itkilərinin qarşısının alınmasında əsas amillərdən biridir.

https://big.az/593576-kartimdan-pul-ogurlanib-bank-kartlarinin-tehlukesizliyi-deleduzlarin-yeni-hiyleleri-ve-qorunma-yollari.html