Xəzər Universitetinin İT departament rəhbəri, “Azərbaycan Kibertəhlükəsizlik Təşkilatları Assosiasiyası” İctimai Birliyinin eksperti Fərid Musayev süni intellektin iqtisadiyyatda yaratdığı yeni imkanlar və gələcəkdə bizneslərin inkişafına təsiri barədə mediaya açıqlama verib.

Fərid Musayev “Globalinfo.az”a açıqlamasında süni intellektin yeni sərvətlərin və biznes imkanlarının yaranmasına təsir göstərə biləcəyini bildirib. O, OpenAI şirkətinin baş direktoru Sam Altmanın süni intellektin yaxın illərdə internetdən daha çox milyonçu yarada biləcəyi ilə bağlı fikirlərini şərh edib.

Ekspertin sözlərinə görə, bu fikir kifayət qədər iddialı olsa da, süni intellektin iqtisadiyyatda yaratdığı dəyişikliklər baxımından müəyyən əsaslara söykənir.

Fərid Musayev qeyd edib ki, süni intellekt bir sıra texniki bacarıqlara olan ehtiyacı azaldaraq, insanların yeni bizneslər qurmasını asanlaşdırır. Əvvəllər proqram təminatı, veb-sayt və müxtəlif rəqəmsal məhsullar yaratmaq üçün proqramlaşdırma və dizayn kimi xüsusi biliklər tələb olunurdusa, hazırda süni intellekt vasitəsilə bu işlərin bir hissəsini daha az texniki biliklə həyata keçirmək mümkündür.

Onun sözlərinə görə, bu imkanlar yeni sahibkarların bazara daxil olmasını asanlaşdıra bilər. Süni intellekt eyni zamanda kiçik komandalarla daha böyük həcmdə işlərin görülməsinə şərait yaradır. Bir nəfər süni intellekt alətlərindən istifadə etməklə marketinq, müştəri xidməti, proqramlaşdırma və digər istiqamətlər üzrə müxtəlif prosesləri idarə edə bilər. Bu isə bizneslərin xərclərinin azalmasına və məhsuldarlığın artmasına imkan yarada bilər.

Fərid Musayev süni intellektin yaratdığı imkanlarla yanaşı, artan rəqabətə də diqqət çəkib.

“Bazara daxil olmaq asanlaşdıqca rəqabət artır, eyni məhsul və xidmətləri təqdim edən şirkətlərin sayı çoxalır. Bu səbəbdən yalnız süni intellektdən istifadə uğur üçün kifayət etməyəcək. Sahibkarın fərqli ideyası, düzgün strategiyası və bazarın tələbatını düzgün qiymətləndirməsi əsas amillərdən olacaq”, – deyə ekspert bildirib.

O, həmçinin, süni intellektdən əldə olunan iqtisadi gəlirlərin böyük texnologiya şirkətlərində daha çox cəmləşməsi ehtimalının olduğunu qeyd edib. Fərid Musayevin sözlərinə görə, süni intellekt yeni biznes imkanları yaratmaqla yanaşı, böyük resurslara malik şirkətlərin mövqeyini də gücləndirə bilər.

Ekspert hesab edir ki, süni intellekt gələcəkdə çoxsaylı yeni biznes imkanları yarada bilər. Bununla belə, bu imkanlardan səmərəli istifadə etmək üçün yalnız texnologiyanı bilmək kifayət etməyəcək. Uğur üçün süni intellektin imkanlarını strateji düşüncə, yaradıcılıq və düzgün biznes yanaşması ilə birləşdirmək vacib olacaq.

https://globalinfo.az/buna-sahib-olan-sexsler-5-ile-milyoncu-olacaqlar-aciqlama/