Xəzər Universitetinin İT departament rəhbəri, Azərbaycan Kibertəhlükəsizlik Təşkilatları Assosiasiyası İctimai Birliyinin eksperti Fərid Musayev son dövrlərdə informasiya texnologiyaları, kibertəhlükəsizlik və rəqəmsal transformasiya ilə bağlı aktual məsələlərə dair yerli media qurumlarına açıqlamalar verib.

Fərid Musayev müxtəlif müsahibə və açıqlamalarında müasir texnologiyaların cəmiyyətə təsiri, rəqəmsal təhlükəsizlik və texnoloji inkişafla bağlı bir sıra aktual məsələlərə toxunub.

Ekspert ictimai Wi-Fi şəbəkələrindən istifadənin yaratdığı kibertəhlükəsizlik riskləri barədə danışaraq, “Man-in-the-Middle” və “Evil Twin” kimi hücum üsullarını izah edib, istifadəçilərə ictimai şəbəkələrdən istifadə zamanı VPN, ikifaktorlu autentifikasiya və digər təhlükəsizlik tədbirlərindən yararlanmağı tövsiyə edib.

Digər açıqlamalarında Fərid Musayev süni intellektin iş proseslərinə təsiri, uşaqların informasiya-kommunikasiya texnologiyalarından istifadəsi və süni intellektdən təhlükəli məqsədlərlə istifadənin qarşısının alınması imkanları barədə fikirlərini bölüşüb. O, süni intellektin əməkdaşların işini tamamilə əvəz etməkdən daha çox, onların iş prosesini dəyişdirdiyini və nəticələrin yoxlanılması, tənqidi düşüncə və insan nəzarətinin əhəmiyyətini artırdığını vurğulayıb.

Fərid Musayev həmçinin, Azərbaycanda mobil rabitə bazarında rəqabət, yeni operatorların bazara daxil olması qarşısında mövcud maneələr, internet trafikinin lokallaşdırılması və genişzolaqlı internet xidmətlərinin inkişafı ilə bağlı məsələləri şərh edib. O, bu sahələrdə texnoloji imkanlarla yanaşı, infrastruktur, investisiya, tənzimləmə və istifadəçi maraqlarının da nəzərə alınmasının vacibliyini qeyd edib.

Ekspertin media çıxışlarında biometrik ödəniş sistemləri, smartfonlarda dəyişdirilə bilən batareyalar, yerli kompüter istehsalı və internet fırıldaqlarından qorunma kimi mövzular da yer alıb.

Xəzər Universitetinin İT departament rəhbərinin bu mövzularla bağlı media çıxışları universitetin informasiya texnologiyaları və kibertəhlükəsizlik sahəsində ekspert fəaliyyətini və müasir texnoloji məsələlərə dair ictimai məlumatlandırmaya verdiyi töhfəni əks etdirir.

https://big.az/592725-pulsuz-internetin-gizli-tehlukesi-hakerler-sizi-bele-izleye-biler.html