AMEA Arxeologiya və Antropologiya İnstitutunun aparıcı elmi işçisi, Xəzər Universitetinin Tarix və arxeologiya departamentinin müəllimi, Dr. Yaqub Məmmədov 2026-cı ilin iyul ayında AMEA Arxeologiya və Antropologiya İnstitutunun Paleolit arxeoloji ekspedisiyasının tərkibində işğaldan azad olunmuş ərazilərdə dosent Azad Zeynalovun rəhbərliyi ilə Paleolit dövrünə dair arxeoloji kəşfiyyat işlərində iştirak etmişdir.

Aparılmış ilkin arxeoloji kəşfiyyat işləri nəticəsində Zəngilan rayonunda Oxçuçayın sol sahili boyunca Tağlı və Soyuqbulaq kəndləri, həmçinin, Keçili kəndi ərazisində, eləcə də Laçın rayonunun Minkənd kəndi ərazisində yerləşən mağaralara baxış keçirilmiş və çay terrasları təhlil olunmuşdur.

Mövcud arxeoloji kəşfiyyat işləri göstərir ki, Zəngilan və Laçın rayonlarının müxtəlif ərazilərində yerləşən mağaralar və çay terrasları Paleolit dövrü insan fəaliyyətinin izlərini öyrənmək üçün mühüm potensiala malikdir. Bu baxışlar gələcəkdə daha genişmiqyaslı qazıntıların aparılması və regionun qədim tarixinin elmi rekonstruksiyası üçün əsaslı zəmin yaradır.