Xəzər Universitetinin informasiya texnologiyaları departamentinin rəhbəri Fərid Musayev Azərbaycanda kompüter istehsalının həcminin dəyişkən olması, yerli məhsulların bazarda rəqabət imkanları və sektorun qarşılaşdığı əsas problemlər barədə ekspert fikirlərini bölüşüb.

Mövzu ilə bağlı Plat.az-a açıqlama verən Fərid Musayev bildirib ki, kompüter istehsalı üzrə statistik göstəricilərdə müşahidə olunan kəskin dəyişikliklər Azərbaycanda bu sahənin hələ böyükmiqyaslı və sabit istehsal modelinə keçmədiyini göstərir.

Ekspertin sözlərinə görə, istehsal göstəricilərindəki dalğalanmaların əsas səbəblərindən biri sifariş əsaslı istehsal modelidir. Dövlət qurumları və ya böyük şirkətlər tərəfindən irihəcmli sifarişlərin verildiyi dövrlərdə istehsal artır, sifarişlərin azaldığı zaman isə istehsal həcmi minimuma enir.

Fərid Musayev həmçinin, Azərbaycanda kompüter bazarında beynəlxalq brendlərin üstün mövqeyə malik olduğunu qeyd edib. Onun sözlərinə görə, HP, Dell, Lenovo, ASUS və digər tanınmış brendlər qiymət, texniki göstəricilər, məhsul çeşidi və zəmanət imkanları baxımından istehlakçılar üçün daha cəlbedici seçimlərdir.

Ekspert bildirib ki, yerli istehsalın əsasən standart ofis kompüterləri istiqamətində cəmləşməsi də rəqabət imkanlarını məhdudlaşdırır. Müasir bazarda isə yüksək performanslı oyun kompüterləri, dizayn və digər peşəkar məqsədlər üçün nəzərdə tutulan sistemlərə tələbat da artır.

Fərid Musayev qeyd edib ki, Azərbaycanda istehsal olunan kompüterlərin böyük hissəsində komponentlərin xaricdən gətirilərək yerli şəkildə birləşdirilməsi modelindən istifadə oluna bilər. Tammiqyaslı istehsal üçün isə mürəkkəb təchizat zənciri, böyük investisiya və geniş istehsal infrastrukturu tələb olunur. Xaricdən komponentlərin alınması və tədarük həcmlərindəki dəyişikliklər də istehsal göstəricilərinə təsir göstərə bilər.

Ekspertin fikrincə, problemin əsas səbəbi kompüterlərə tələbatın olmaması deyil. Əsas məsələ mövcud tələbatın yerli məhsullara kifayət qədər yönəlməməsidir. İstehlakçılar və şirkətlər kompüter seçərkən daha çox brendin etibarlılığı, texniki xüsusiyyətlər, qiymət və zəmanət xidmətlərini nəzərə alırlar.

Fərid Musayev vurğulayıb ki, yerli istehsalçıların rəqabət qabiliyyətli və stabil istehsal modeli formalaşdıra bilməsi üçün bazarın tələblərinə uyğun məhsul çeşidi, davamlı təchizat zənciri və daha geniş istehsal imkanları vacibdir.

Ekspertin sözlərinə görə, hazırkı göstəricilər Azərbaycanda kompüter istehsalının geniş sənaye sahəsindən daha çox konkret sifarişləri yerinə yetirən kiçikmiqyaslı sektor kimi fəaliyyətdə olduğunu göstərir.

Linkə keçid: https://plat.az/ikt/yerli-komputerlerimiz-niye-reqabete-tab-getirmir-aciqlama