Xəzər Universitetinin İnformasiya texnologiyaları departamentinin rəhbəri Fərid Musayev biometrik texnologiyalar vasitəsilə ödənişlərin tətbiqi, bu sistemlərin üstünlükləri və Azərbaycanda istehlakçıların yeni texnologiyaya adaptasiyası barədə ekspert fikirlərini bölüşüb.

Mövzu ilə bağlı Plat.az-a açıqlama verən Fərid Musayev bildirib ki, üztanıma texnologiyası əsasında həyata keçirilən ödənişlər rəqəmsal iqtisadiyyatın inkişafında növbəti mərhələlərdən biri kimi qiymətləndirilə bilər.

Ekspertin sözlərinə görə, biometrik ödənişlərin əsas üstünlüklərindən biri rahatlıq və vaxta qənaətdir. İstifadəçinin ödəniş zamanı bank kartı, telefon və ya nağd puldan istifadə etməsinə ehtiyac qalmır. Bu, xüsusilə supermarketlər, nəqliyyat və sürətli xidmət məntəqələrində ödəniş prosesinin sürətlənməsinə və növbələrin azalmasına imkan verə bilər.

Fərid Musayev qeyd edib ki, biometrik ödənişlər fiziki ödəniş vasitələrindən asılılığı da azaldır. Kartın itirilməsi, telefonun enerji ehtiyatının tükənməsi və ya nağd pulun olmaması kimi hallar bu ödəniş üsulunda problem yaratmır. Eyni zamanda, kart məlumatlarının kopyalanması kimi bəzi risklərin azaldılması biometrik texnologiyaların potensial üstünlükləri sırasında yer alır.

Ekspert Azərbaycan istehlakçılarının yeni texnologiyaya münasibətinin isə bir neçə amildən asılı olacağını bildirib. Onun sözlərinə görə, Azərbaycanda rəqəmsal ödənişlərin geniş yayılması əhalinin yeni ödəniş texnologiyalarına uyğunlaşması üçün müəyyən zəmin yaradıb.

Bununla yanaşı, Fərid Musayev biometrik məlumatların məxfiliyinin əsas məsələlərdən biri olacağını vurğulayıb. İstehlakçıların üz məlumatlarının harada saxlanılması, necə qorunması və kimlərin həmin məlumatlara çıxış əldə edə bilməsi ilə bağlı sualları yeni sistemlərə olan etimada birbaşa təsir göstərə bilər.

Ekspert həmçinin, sistemin texniki etibarlılığının həlledici əhəmiyyət daşıdığını qeyd edib. Onun fikrincə, istifadəçilərin biometrik ödənişlərə davamlı keçidi üçün sistem yüksək dəqiqliklə işləməli, yanlış identifikasiya və ödəniş prosesində ləngimələr minimum səviyyədə olmalıdır.

Fərid Musayevin sözlərinə görə, biometrik ödənişlərin Azərbaycanda uğurlu tətbiqi üçün texnoloji imkanlarla yanaşı, məlumatların təhlükəsizliyi və məxfiliyinin təmin olunması, həmçinin, istehlakçı etimadının formalaşdırılması əsas şərtlərdən olacaq.