Xəzər Universitetinin İnformasiya texnologiyaları departamentinin rəhbəri Fərid Musayev Azərbaycanda mobil rabitə bazarında yeni operatorların qarşılaşdığı əsas maneələr və rəqabət mühitinin gücləndirilməsi imkanları barədə ekspert fikirlərini bölüşüb.

Mövzu ilə bağlı BiG.AZ-a açıqlama verən Fərid Musayev bildirib ki, yeni mobil operatorun bazara daxil olması yalnız texnoloji imkanlardan asılı deyil. Radiofrekans spektrinə çıxış, lisenziya tələbləri, yüksək infrastruktur xərcləri və dövlət tənzimləmələri yeni operatorlar üçün əsas maneələr sırasındadır.

Ekspert qeyd edib ki, radiofrekans spektri məhdud resursdur və mövcud operatorların istifadə etdiyi tezliklər nəzərə alındıqda yeni iştirakçı üçün uyğun tezliklərin ayrılması çətin ola bilər. Bununla yanaşı, müvafiq lisenziyaların əldə edilməsi də əhəmiyyətli maliyyə vəsaiti tələb edir.

Fərid Musayev yeni operator üçün digər mühüm çətinliyin infrastruktur quruculuğu olduğunu vurğulayıb. Ölkə üzrə geniş antena və rabitə şəbəkəsinin yaradılması böyük həcmdə və uzunmüddətli investisiya tələb edir. Bu isə yeni iştirakçı üçün maliyyə risklərini artırır.

Ekspertin sözlərinə görə, dövlət tənzimləmələri və lisenziya şərtləri də mobil rabitə bazarına giriş imkanlarına ciddi təsir göstərir. Eyni zamanda, mövcud böyük operatorların maliyyə və institusional imkanları yeni rəqiblərin bazara daxil olmasını çətinləşdirən amillərdən biridir.

Fərid Musayev qeyd edib ki, bazarda rəqabətin zəifləməsi mövcud operatorların qiymət müəyyənləşdirmə imkanlarını artıra bilər. Yeni operatorların bazara daxil olması üçün isə radiofrekansların daha əlçatan şərtlərlə bölüşdürülməsi, investisiya stimullarının yaradılması və rəqabət qanunvericiliyinin effektiv tətbiqi mühüm əhəmiyyət daşıyır.

Ekspertin fikrincə, dayanıqlı rəqabət mühitinin formalaşdırılması üçün yeni operatorların bazara daxil olmasını asanlaşdıran iqtisadi və tənzimləyici mexanizmlərin yaradılması vacibdir. Bunun üçün uyğun tezliklərin mövcudluğu, lisenziya xərclərinin məqbul səviyyədə olması, investisiya imkanlarının genişləndirilməsi və rəqabət mühitinin qorunması əsas şərtlərdir.