Xəzər Universitetinin İnformasiya texnologiyaları departamentinin rəhbəri Fərid Musayev smartfonların istifadəçiləri dinləməsi ilə bağlı geniş yayılmış fikirlər və rəqəmsal izləmə mexanizmləri barədə ekspert fikirlərini bölüşüb.

Mövzu ilə bağlı Redaktor.az-a açıqlama verən Fərid Musayev bildirib ki, istifadəçilərin müəyyən məhsul və ya mövzu haqqında danışdıqdan sonra həmin mövzu ilə bağlı reklam və paylaşımlarla qarşılaşması telefonların onları dinləməsi təəssüratı yarada bilər. Ekspertin sözlərinə görə, bu hadisənin izahında istifadəçilərin rəqəmsal davranışlarının analiz edilməsi mühüm rol oynayır.

Fərid Musayev qeyd edib ki, telefonun mikrofon vasitəsilə istifadəçini dinləməsi və söhbətləri reklam məqsədilə qeydə alaraq analiz etməsi ilə bağlı birbaşa sübut olunmuş ümumi mexanizm yoxdur. Bununla yanaşı, sosial şəbəkələr və digər rəqəmsal platformalar istifadəçilərin baxışlarını, kliklərini, axtarışlarını, saytlardakı fəaliyyətini və digər davranışlarını analiz edərək, onların gələcək maraqlarını proqnozlaşdıra bilirlər.

Ekspertin sözlərinə görə, istifadəçi hər hansı məhsul barədə danışmasa belə, həmin məhsulla bağlı videoya baxması, şəkillə maraqlanması və ya müvafiq internet səhifəsinə daxil olması alqoritmlər üçün siqnal rolunu oynaya bilər. Yaş, məkan, maraqlar və digər istifadəçi məlumatları ilə birlikdə bu siqnallar əsasında kifayət qədər dəqiq rəqəmsal profil formalaşdırmaq mümkündür.

Fərid Musayev həmçinin, müxtəlif istifadəçilərin məlumatları arasındakı əlaqələrin də reklamların hədəflənməsində rol oynaya biləcəyini vurğulayıb. Məsələn, eyni məkanda olan və oxşar maraqlara malik şəxslərin davranışları sistem tərəfindən əlaqələndirilə və müəyyən məhsul və ya xidmətlə bağlı reklamların digər istifadəçiyə də göstərilməsinə səbəb ola bilər.

Ekspert mikrofon icazələrinin ayrıca diqqət tələb etdiyini bildirib. Onun sözlərinə görə, səsli mesaj və ya video funksiyalarından istifadə edən tətbiqlər mikrofona giriş icazəsi tələb edə bilər və istifadəçilər tətbiqlərə verdikləri icazələri mütəmadi olaraq nəzərdən keçirməlidirlər.

Fərid Musayev qeyd edib ki, istifadəçilərin rəqəmsal fəaliyyəti nəticəsində formalaşan məlumat profili kifayət qədər əhatəli ola bilər. Nəticədə gündəlik söhbətlərdə müzakirə olunan mövzularla sosial şəbəkələrdə qarşıya çıxan reklamların üst-üstə düşməsi insanda telefonun onu dinlədiyi təəssüratını yarada bilər.

Linkə keçid: https://redaktor.az/news/tech/338655-telefon-sizi-dinlemir-bes-nece-olur-ki-ne-dusunduyunuzu-bilir