Xəzər Universitetinin İnformasiya texnologiyaları departamentinin rəhbəri Fərid Musayev süni intellekt sistemlərinin əlçatmaz olması və bu texnologiyadan həddindən artıq asılılığın yarada biləcəyi risklər barədə ekspert fikirlərini bölüşüb.

Mövzu ilə bağlı BiG.AZ-a açıqlama verən Fərid Musayev bildirib ki, süni intellektin bütün sahələrdə deyil, əsasən, proseslərin optimallaşdırılması, məlumatların təhlili və avtomatlaşdırılması istiqamətində mühüm dəyişikliklər yaradacağı daha real yanaşmadır.

Ekspertin sözlərinə görə, süni intellektin geniş istifadəsi müəssisələrin bu texnologiyadan asılılığını artıra bilər. Xüsusilə, bütün kritik qərar və əməliyyatların yalnız bir süni intellekt modelindən asılı vəziyyətə salınması və alternativ fəaliyyət planının olmaması ciddi risk yaradır.

Fərid Musayev qeyd edib ki, peşəkar yanaşmada süni intellekt iş proseslərinin əvəzedicisi olaraq deyil, onları sürətləndirən və dəstəkləyən vasitə kimi qəbul edilməlidir. Bu halda sistemdə nasazlıq və ya əlçatmazlıq yarandıqda proseslər tamamilə dayanmaq əvəzinə yalnız müəyyən dərəcədə yavaşlaya bilər.

Ekspert həmçinin, süni intellekt nəticələrinin insan tərəfindən yoxlanılmadan qəbul edilməsinin əsas risklərdən biri olduğunu vurğulayıb. Onun sözlərinə görə, insan nəzarətinin olmadığı iş modelində süni intellektin yanlış nəticələri və ya sistem xətaları ciddi fəsadlara səbəb ola bilər.

Fərid Musayevin fikrincə, əsas iş prosesləri, strateji düşüncə və kritik qərarlar insan nəzarətində qalmalı, süni intellekt isə bu prosesləri dəstəkləyən güclü vasitə kimi istifadə olunmalıdır. Belə yanaşma texnoloji problemlər və sistem xətaları zamanı iş proseslərinin tamamilə dayanmasının qarşısını almağa imkan verir.

Linkə keçid: https://big.az/590984-suni-intellekt-cokerse-isler-de-dayanacaq-ekspert-aciqladi.html