Xəzər Universitetinin İnformasiya texnologiyaları departamentinin rəhbəri Fərid Musayev onlayn alış-veriş zamanı kiberdələduzluq riskləri və saxta satış səhifələrinin müəyyənləşdirilməsi ilə bağlı ekspert fikirlərini bölüşüb.

Mövzu ilə bağlı Demokrat.az-a açıqlama verən Fərid Musayev bildirib ki, onlayn alış-veriş zamanı istehlakçılar alış-veriş etdikləri saytın domen adına və digər əsas məlumatlara diqqət yetirməlidirlər. Ekspertin sözlərinə görə, dələduzlar bəzən tanınmış və rəsmi saytların adlarını bir neçə hərflə dəyişdirərək, saxta internet səhifələri yaradırlar.

Fərid Musayev qeyd edib ki, məhsulun bazar qiymətindən əhəmiyyətli dərəcədə aşağı qiymətə təklif olunması ciddi xəbərdarlıq siqnalıdır. Eyni zamanda, saytda “https://” protokolunun və kilid işarəsinin olması müəyyən təhlükəsizlik göstəricisi olsa da, bunun təkbaşına saytın etibarlılığını təsdiqləmədiyini vurğulayıb.

Ekspert alıcıların saytda rəsmi ünvan, iş saatları, sabit telefon nömrəsi və məhsulların geri qaytarılması siyasəti kimi məlumatların olub-olmadığını yoxlamasını tövsiyə edib.

Fərid Musayev həmçinin, ödəniş zamanı yalnız rəsmi və təhlükəsiz bank keçidlərindən istifadə etməyin vacibliyini qeyd edib. Onun sözlərinə görə, şübhəli şəxslərlə kart məlumatları, CVV kodu və mobil pul kisələrinə dair məlumatlar paylaşılmamalıdır.

Ekspert vətəndaşlara məhsulları sosial şəbəkələrdəki təsadüfi reklamlardan deyil, tanınmış və etibarlı platformalardan, o cümlədən rəsmi marketpleyslərdən axtarmağı, məhsul rəylərini diqqətlə yoxlamağı tövsiyə edib. Eyni tonda və çox qısa yazılmış çoxsaylı rəylərin saxta olma ehtimalına da diqqət çəkib.

Fərid Musayev qeyd edib ki, qeydiyyat zamanı zəruri olmayan şəxsi məlumatları, o cümlədən şəxsiyyət vəsiqəsinin və ya pasportun surətini tələb edən saytlara qarşı xüsusilə ehtiyatlı olmaq lazımdır. Onun sözlərinə görə, həddindən artıq cəlbedici təklif və təcili ödəniş tələbi ilə qarşılaşdıqda qərar verməzdən əvvəl məlumatı bir neçə müstəqil mənbədən yoxlamaq ən düzgün yanaşmadır.

Linkə keçid: https://demokrat.az/az/news/292333/deleduzluq-riski-saxta-satis-sehifelerini-nece-taniyaq