Xəzər Universitetinin İnformasiya texnologiyaları departamentinin rəhbəri Fərid Musayev saxta “WhatsApp” hesablarından istifadə etməklə həyata keçirilən kiberdələduzluq halları ilə bağlı ekspert fikirlərini bölüşüb.

Mövzu ilə bağlı “Report”-a açıqlama verən Fərid Musayev bildirib ki, son dövrlərdə dövlət qurumlarının və müxtəlif təşkilatların əməkdaşlarına rəhbər şəxslərin fotoşəkillərindən istifadə edilməklə yaradılmış saxta “WhatsApp” hesablarından “təcili” xarakterli mesajların göndərilməsi kibertəhlükəsizlik baxımından ciddi risklər yaradır.

Ekspertin sözlərinə görə, əməkdaşların əlaqə məlumatlarının açıq internet resurslarından kütləvi şəkildə toplanmasının qarşısının alınması üçün texniki və təşkilati tədbirlər görülməlidir. Bu məqsədlə bot fəaliyyətinin aşkarlanması, sorğulara limitlərin tətbiq edilməsi, əlaqə məlumatlarının maskalanması və API nəzarətinin gücləndirilməsi kimi mexanizmlərdən istifadə oluna bilər.

Fərid Musayev şübhəli mesajlarla qarşılaşan əməkdaşlara göndərənin kimliyini digər rəsmi kommunikasiya kanalları vasitəsilə yoxlamağı tövsiyə edib. O vurğulayıb ki, rəsmi tapşırıqların şəxsi messencerlər vasitəsilə deyil, korporativ kommunikasiya platformaları üzərindən verilməsi və təşkilatlarda “Sıfır Etibar” (Zero Trust) modelinin tətbiqi kibertəhlükəsizlik risklərinin azaldılmasında mühüm rol oynayır.

Ekspert həmçinin, təşkilatlarda əməkdaşların kibertəhlükəsizlik üzrə davamlı maarifləndirilməsinin vacibliyini qeyd edib. Onun fikrincə, simulyasiya edilmiş fişinq hücumları, mütəmadi təlimlər və şübhəli mesajlar zamanı atılacaq addımları müəyyən edən aydın protokollar mümkün kibertəhdidlərə qarşı hazırlığın gücləndirilməsinə kömək edir.

Linkə keçid: https://report.az/ikt/saxta-whatsapp-mesajlarindan-nece-qorunmaq-olar-ekspert-reyleri