Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin tabeliyində fəaliyyət göstərən Gəncə Dövlət Tarix-Mədəniyyət Qoruğunun böyük elmi işçisi Aynur Həsənovanın moderatorluğu ilə 2026- cı il iyunun 13- də  "Azərbaycan Arxeologiyasında Yeni Elmi Tədqiqatlar və Perspektivlər" adlı onlayn elmi - praktiki konfrans keçirilib.

 Konfransın əsas məqsədi ölkəmizin zəngin tarixi - mədəni irsinin elmi əsaslarla öyrənilməsi, müasir arxeoloji tədqiqatların nəticələrinin elmi ictimaiyyətə təqdim edilməsi və gələcək inkişaf perspektivlərinin müəyyənləşdirilməsi olub. Konfransda AMEA Arxeologiya və Antropologiya İnstitutunun rəqəmsal inkişaf və süni intellekt üzrə direktor müavini dosent Dr. Pərviz Qasımov, institutun Fiziki antropologiya laboratoriyasının  müdiri Vüsal Həsənov, həmçinin,aparıcı elmi işçilər,  dosent Dr. Nəcəfov, dosent Dr. Rəşid Bəşirov və aparıcı elmi işçi, Xəzər Univerisitetinin Tarix və arxeologiya departamentinin müəllimi Dr. Yaqub Məmmədov Qarabağ və Şərqi Zəngəzur iqtisadi rayonlarında, eləcə də respublikanın digər bölgələrində həyata keçirilən arxeoloji ekspedisiyaların  nəticələri haqqında geniş məruzələrlə çıxış ediblər.

İşğaldan azad olunmuş Xocəvənd rayonunda yerləşən Tağlar mağarasında aparılan Azərbaycan-Yaponiya birgə beynəlxalq arxeoloji ekspedisiyasının üzvü Dr. Yaqub Məmmədov mağarada 2023-cü ildən etibarən aparılan tədqiqatlar nəticəsində əldə olunmuş mühüm nəticələri konfrans iştirakçılarının diqqətinə çatdırıb.

 Qeyd etmək lazımdır ki, Tağlar mağarası 1960-cı ildə Məmmədəli Hüseynov tərəfindən qeydə alınıb və 1964-1986-cı illərdə mərhələlərlə tədqiqat aparılıb. Hazırda davam edən tədqiqatların əsas məqsədi müasir arxeoloji metodlardan istifadə etməklə, Neandertalların Cənubi Qafqazda məskunlaşmasını, uyğunlaşmasını və sonda Homo sapiens tərəfindən əvəz olunmasını öyrənməkdir.

Tədbirdə Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin tabeliyində fəaliyyət göstərən Qoruqların əməkdaşları da iştirak ediblər.