2026-cı il iyulun 9-da  Xəzər Universiteti Psixologiya departamentinin əməkdaşı, Xəzər Psixoloji Xidmət Mərkəzinin psixoloqu Mirsadiq Muxtarov  Azərbaycan Respublikası Əmək və Əhalinin Sosial Müdafiəsi Nazirliyinin uşaq evi sosial xidmət müəssisələrində yaşayan, valideyn himayəsindən məhrum olmuş uşaqlarla "Problemlərin həll edilməsi" mövzusunda maarifləndirici seminar keçirib.

Seminar Xəzər rayonu, Buzovna qəsəbəsində yerləşən “Valideyn himayəsindən məhrum olmuş uşaqların yay istirahət düşərgəsi”ndə olub. Seminarın əsas məqsədi uşaqlarda problem həlletmə, tənqidi düşünmə, məsuliyyətli qərarvermə və özünəinam bacarıqlarının inkişafına dəstək olmaq, onların sosial və emosional bacarıqlarını gücləndirməkdir.

Seminar zamanı Mirsadiq Muxtarov uşaqlarla gündəlik həyatda qarşılaşdıqları çətinliklərin düzgün qiymətləndirilməsi, problemlərin səbəblərinin müəyyən edilməsi və onların mərhələli şəkildə həll edilməsi yolları barədə ətraflı müzakirələr aparıb. İştirakçılara emosiyaların idarə olunması, tələsik qərarlar verməməyin əhəmiyyəti, müxtəlif vəziyyətlərdə alternativ həll yolları axtarmaq, düzgün qərar qəbuletmə bacarıqları və effektiv ünsiyyətqurma üsulları haqqında praktiki məlumatlar təqdim edilib.

Seminar interaktiv formatda təşkil olunub.  Real həyat nümunələri, situasiya tapşırıqları və qrup müzakirələri vasitəsilə uşaqlar problemlərə fərqli baxış bucağından yanaşmağın, əməkdaşlığın və qarşılıqlı dəstəyin əhəmiyyətini bildiriblər.