Xəzər Universiteti daha bir mühüm elmi nailiyyətini qürurla təqdim edir. Universitetin KDI komandası Müdafiə Sənayesi Nazirliyi tərəfindən həyata keçirilən “Milli energetik materialların inkişafı proqramı” çərçivəsində keçirilən müsabiqədə iştirak edən səkkiz universitet arasında III yerə layiq görülmüşdür.

Proqram ölkənin aparıcı ali təhsil müəssisələrinin tədqiqatçılarını bir araya gətirərək, energetik materiallar sahəsində innovativ həllərin hazırlanmasına və elmi əməkdaşlığın gücləndirilməsinə mühüm töhfə vermişdir.

KDI komandasına Xəzər Universitetinin Kimya və kimya mühəndisliyi departamentinin müdiri, kimya üzrə fəlsəfə doktoru Tahir Cavadzadə rəhbərlik etmişdir. Komandanın digər üzvləri isə departamentin əməkdaşları Dr. Ülviyyə Yolçuyeva, Güllü Əliyeva, Esmira Eyyubova və Mirsaleh Heydərov  olmuşlar. Onların peşəkar bilikləri, elmi hazırlığı və komanda şəklində səmərəli fəaliyyəti layihənin uğurla həyata keçirilməsində mühüm rol oynamışdır.

Xəzər Universiteti Tahir Cavadzadəni və KDI komandasının bütün üzvlərini bu əlamətdar nailiyyət münasibətilə səmimi qəlbdən təbrik edir. Bu uğur universitetin elmi tədqiqatların inkişafına, innovasiyaların təşviqinə və Azərbaycanın elmi-texnoloji potensialının gücləndirilməsinə verdiyi töhfənin daha bir göstəricisidir.