Xəzər Universitetinin Həyat elmləri departamentinin Biotexnologiya ixtisası üzrə təhsil alan 16 və  Biologiya müəllimliyi ixtisası üzrə 2 tələbəsi 2026 – cı il 15 may – 15  iyun aralığında  Azərbaycan Respublikası Elm və Təhsil Nazirliyinin Genetik Ehtiyatlar İnstitutunda təşkil olunan təcrübə proqramında iştirak ediblər.

Tələbələr qruplara bölünərək, hər qrup bir ay müddətində institutun Sitogenetika şöbəsində laboratoriya məşğələlərinə cəlb olunublar. Təcrübənin əsas məqsədi tələbələrin nəzəri biliklərini laboratoriya şəraitində tətbiq etmələri, müasir sitogenetik və bitki biologiyası metodları ilə tanış olmaları, eləcə də elmi-tədqiqat bacarıqlarını artırmaları olub.

Proqramın ilk mərhələsində tələbələr Genetik Ehtiyatlar İnstitutunun tarixi, fəaliyyət istiqamətləri, laboratoriyaları və elmi infrastrukturu ilə tanış olublar. Onlara bitki genetik ehtiyatlarının toplanması, qeydiyyatı, emalı və uzunmüddətli saxlanılması prinsipləri barədə ətraflı məlumat verilib.

Praktiki məşğələlər zamanı tələbələr müxtəlif taxıl bitkilərindən yarpaq nümunələri toplayaraq, onların anatomik xüsusiyyətlərini öyrəniblər. Dırnaq lakı vasitəsilə epidermal ottisk metodundan istifadə etməklə yarpaqların üst və alt epidermisindən preparatlar hazırlanıb. Əldə olunan preparatlar işıq mikroskopu altında tədqiq edilərək, çoxsaylı mikrofotoşəkillər çəkilib.

Toplanmış mikroskopik görüntülər əsasında müxtəlif taxıl növləri, eləcə də eyni yarpağın üst və alt səthləri arasında ağızcıqların (stomaların) sayı statistik üsullarla müqayisə olunub və alınan nəticələr təhlil edilib.

Bu təcrübə proqramı tələbələrə laboratoriya avadanlıqları ilə işləmək, preparat hazırlamaq, mikroskopik müşahidələr aparmaq, elmi məlumat toplamaq və statistik analiz üsullarından istifadə bacarıqlarını inkişaf etdirmək imkanı yaradıb. Eyni zamanda, onlar elmi-tədqiqat işinin planlaşdırılması və həyata keçirilməsi prosesini yaxından öyrənərək, gələcək peşə fəaliyyətləri üçün gərəkli praktiki təcrübə qazanıblar.