Xəzər Universitetinin koordinatoru olduğu DIRNA layihəsinin 4-cü iş paketi (WP4.5) çərçivəsində Finlandiyadan olan  tərəfdaşlar tərəfindən 2025-ci ilin oktyabr ayından etibarən təşkil olunan onlayn təlimlər silsiləsinin 2026- cı il iyunun 29- da  yekun sessiyası keçirilib. Təlimlər layihə iştirakçılarının bilik və bacarıqlarının artırılması, beynəlxalq təcrübə mübadiləsinin təşviq edilməsi və ali təhsil müəssisələrində rəqəmsal transformasiya proseslərinin dəstəklənməsi məqsədi daşıyıb.  

Onlayn təlimlər silsiləsinin yekun sessiyası Xəzər Universitetinin Kitabxana İnformasiya Mərkəzinin direktoru Aytac Misgərlinin moderatorluğu ilə keçirilib. Seminar layihənin Finlandiyadan olan tərəfdaşları Kati Clements və Saana Mehtälä tərəfindən təqdim olunub. Sessiya layihə çərçivəsində keçirilmiş təlimlərin nəticələrinin ümumiləşdirilməsinə, hazırlanmış tədris materiallarının təqdimatına, həmçinin, gələcək əməkdaşlıq istiqamətlərinin və yeni birgə layihə imkanlarının müzakirəsinə həsr olunub.

Seminarda qeyd edilib ki, təlim proqramı Yay Məktəbi və təcrübə səfərləri zamanı müəyyən edilmiş ehtiyaclar əsasında formalaşdırılıb. İlk təlim sessiyalarından sonra iştirakçılar arasında keçirilmiş sorğunun nəticələrinə uyğun olaraq, proqram təkmilləşdirilib, iştirakçıların daha çox maraq göstərdiyi mövzular üzrə əlavə tədris materialları hazırlanıb.

Sessiya çərçivəsində beynəlxalq repozitoriyalar, universitet reytinqləri, elmi tədqiqatların maliyyələşdirilməsi, beynəlxalq əməkdaşlığın inkişafı, məlumatların idarə olunması və informasiya sistemlərinə etimad kimi aktual mövzular ətrafında müzakirələr aparılıb. Eyni zamanda, universitetlər arasında təcrübə mübadiləsinin genişləndirilməsi, uğurlu yerli təcrübələrin paylaşılması və beynəlxalq əməkdaşlığın daha da gücləndirilməsinin əhəmiyyəti vurğulanıb.

Görüşün ikinci hissəsində tərəfdaşlar gələcək əməkdaşlıq perspektivləri barədə fikir mübadiləsi apararaq, yeni birgə layihələrin hazırlanması imkanlarını müzakirə ediblər. Müzakirələr zamanı süni intellektin təhsildə tətbiqi, rəqəmsal transformasiya, davamlı inkişaf, planetar rifah, müəllim hazırlığı, STEAM təhsili və innovativ təlim mühitlərinin inkişafı gələcək əməkdaşlıq üçün prioritet istiqamətlər kimi qiymətləndirilib.

Seminarın sonunda moderator Aytac Misgərli layihənin icrasında göstərdikləri fəal iştirak və səmərəli əməkdaşlığa görə, bütün tərəfdaş universitetlərə təşəkkür edib. O, DIRNA layihəsi çərçivəsində formalaşmış uğurlu tərəfdaşlığın gələcəkdə də davam etdirilməsinin və yeni beynəlxalq layihələrin hazırlanmasının ali təhsil sahəsində əməkdaşlığın daha da inkişafına mühüm töhfə verəcəyinə əminliyini bildirib.