Xəzər Universiteti Psixologiya departamentinin əməkdaşı, Xəzər Psixoloji Xidmət Mərkəzinin psixoloqu Mirsadiq Muxtarov 2026-cı il iyunun 18-də “İnformator.az” xəbər portalına müsahibə verib. O, “Psixiatriya yardımı haqqında” qanuna təklif edilən dəyişikliklər və bu dəyişikliklərin insan hüquqları, psixi sağlamlıq xidmətləri və ictimai təhlükəsizlik baxımından mümkün təsirləri barədə fikirlərini bölüşüb.

Psixoloq bildirib ki, psixiatrik müayinə və müalicə sahəsində əsas prinsiplərdən biri şəxsin seçimlərinə və məlumatlandırılmış razılığına hörmət edilməsidir. Onun sözlərinə görə, məcburi müayinə yalnız istisna hallarda və ciddi hüquqi əsaslar olduqda tətbiq edilməlidir. Beynəlxalq təcrübədə bu cür müdaxilələr, əsasən şəxsin özünə və ya ətrafdakılara real təhlükə yaratdığı hallarda həyata keçirilir. Mirsadiq Muxtarov, həmçinin, vurğulayıb ki, riskin qiymətləndirilməsi diaqnozdan daha çox, şəxsin davranışları, psixi vəziyyəti və sosial mühiti kimi amillərə əsaslanmalıdır. O əlavə edib ki, psixi pozuntusu olan insanların əksəriyyətinin təhlükəli olması ilə bağlı təsəvvürlər elmi araşdırmalarla təsdiqlənmir və belə şəxslər çox vaxt stiqma və ayrı-seçkiliklə üzləşirlər.

Mirsadiq Muxtarov əlavə edib ki, qanunvericiliyə təklif olunan dəyişikliklər təxirəsalınmaz hallarda risk altında olan şəxslərin vaxtında tibbi yardım almasına şərait yarada bilər. Bununla yanaşı, o vurğulayıb ki, qanunun tətbiqi zamanı şəffaf prosedurların, peşəkar ekspert qiymətləndirməsinin və hüquqi təminatların mövcudluğu xüsusi əhəmiyyət daşıyır.

Müsahibənin tam versiyası aşağıdakı linkdə:

https://www.informator.az/haber/polis-v-t-ndasi-raziligi-olmadan-psixiatrik-muayin-y-gond-r-bil-c-k