Xəzər Universiteti Dillər və ədəbiyyatlar departamentinin və Anadolu Məktəbinin  təşkilatçılığı ilə 2026-cı il iyunun 11- də  “Azərbaycan–Türkiyə mütaliələri: Xəzər Universiteti Tələbə Paneli” keçirilmişdir. Paneli giriş sözü ilə Dillər və ədəbiyyatlar departamentinin müdiri, dosent Dilbər Zeynalova açmış, panelin türk xalqları ədəbiyyatı və mənəvi birlik üçün əhəmiyyətini vurğulamışdır. Anadolu Məktəbi İdarə Heyətinin sədri, prof. Sami Güçlü  çıxışında Anadolu Məktəbi mütaliələrinin bütün türk dünyasında keçirildiyini və Xəzər Universitetindəki panelin yüksək səviyyədə təşkil olunduğunu qeyd etmişdir. Xəzər Universiteti Azərbaycan dili və ədəbiyyatı müəllimliyi ixtisasının 4-cü kurs tələbələri Məryəm Mehdiyeva panelin aparıcısı və Nərmin Xankişiyeva panel sədri kimi çıxış etmiş, İlahə Balakişiyeva “İnsan, varlıq və daxili aləm: zamanın içində bir səyahət”, Gülçöhrə Abasova “Türk ədəbiyyatında xalq və hakimiyyət”, Səfiyə Abzərova “Zamanın birliyində ədalət anlayışı: beş əsər, tək üfüq”, Nərmin Xanbabayeva “Türk ədəbiyyatında mif və müqəddəs ünsürlər” mövzularında məruzə etmişlər. Bakı Avrasiya Universitetinin baş müəllimi, filologiya üzrə fəlsəfə doktoru Aytən Abbasova və Bakı Anadolu Liseyi Türk dili və ədəbiyyatı müəllimi Maral Bahar da panelin əhəmiyyəti haqda danışmışlar.