Azərbaycan Respublikasının İnsan Hüquqları üzrə Müvəkkilinin (Ombudsman) elan etdiyi "İnsan Hüquqları Aylığı" çərçivəsində təhsil müəssisələrində maarifləndirmə tədbirləri davam edir. Bu proqrama uyğun olaraq, Azərbaycan Dövlət Rəssamlıq Akademiyası nəzdində İncəsənət Kollecində  Xəzər Universiteti Psixologiya departamentinin koordinatoru, Xəzər Psixoloji Xidmət Mərkəzinin rəhbəri, psixoloq Mələk Kərimovanın tələbələr üçün

mühazirə-təlimi təşkil edilib. "Təhsil mühitində tələbələrin ünsiyyət mədəniyyəti və etik davranış normaları" mövzusuna həsr olunan görüşdə universitet və kollec mühitindəki tələbələrarası qarşılıqlı münasibətləri, o cümlədən tələbələrin gələcək peşəkar fəaliyyətlərində etik qaydaların rolu müzakirə olunub. Mələk Kərimova çıxışında müasir gəncliyin formalaşmasında təkcə akademik biliklərin deyil, həm də emosional intellektin, effektiv ünsiyyət bacarıqlarının və bərabərhüquqlu münasibətlərin vacibliyini vurğulayıb.

İnteraktiv formatda keçən təlim müddətində müəllim-tələbə və tələbə-tələbə münasibətlərində qarşılıqlı hörmət prinsipləri, təhsil mühitində yarana biləcək anlaşılmazlıqların stressiz və etik normalar çərçivəsində həlli yolları, hər bir tələbənin təhsil mühitində özünü təhlükəsiz və bərabərhüquqlu hiss etməsinin psixoloji tərəfləri izah edilib. Təlimçi yaradıcı insanların daxili dünyası və emosional spektrinin geniş olduğunu əks etdirən müxtəlif tədqiqatlardan söz açaraq,

bu görüşün  gənclərin həm fərdi hüquqlarını dərk etməsi, həm də cəmiyyətdə sağlam ünsiyyət qurması baxımından xüsusi əhəmiyyətni qeyd edib.    

Tədbirin sonunda tələbələri maraqlandıran suallar cavablandırılıb və mövzu ətrafında geniş fikir mübadiləsi aparılıb. Kollec rəhbərliyi və tələbələr gənclərin psixoloji maariflənməsinə xidmət edən bu cür görüşlərin davamlı keçirilməsinin vacibliyini qeyd edərək, təşkilatçılara  təşəkkürlərini bildiriblər.