Bakının Nizami Kino Mərkəzində 2026- cı il mayın 29 – da  Xəzər Universitetinin İqtisadiyyat və menecment fakültəsinin tələbəsi və Musiqi Klubunun rəhbəri Bəhruz Sultanovun təşəbbüsü, Gənclər və İdman Nazirliyinin dəstəyi ilə “Nosart Konfrans və Konsert” layihəsi çərçivəsində  növbəti tədbir təşkil olunub.  Tədbir tələbələrin həm maariflənməsi, həm də mədəni-əyləncəli proqramlardan faydalanması məqsədi daşıyıb.

Xəzər Universitetinin rektoru Dr. Raziyə  İsayeva spiker olaraq tədbirdə iştirak edib.

Layihə çərçivəsində konfrans və konsert bir formatda təqdim olunub. Konfrans hissəsində müxtəlif sahələri təmsil edən spikerlər gənclərlə öz təcrübələrini bölüşərək, onların karyera və şəxsi inkişafına dair fikirlərini bildiriblər. Spikerlər sırasında biznes, marketinq, insan resursları, gənclərlə iş və mədəniyyət sahələrində fəaliyyət göstərən mütəxəssislər çıxış ediblər.

Tədbirdə həmçinin, “CineMasterd” kinoteatrlar şəbəkəsinin rəhbəri Zaur Darabzadə, “Bolt Business”in  ölkə rəhbəri Salman Babazadə, “Baku Electronics”in marketinq direktoru Aslan Həsənli, “PASHA Malls” İnsan Resursları şöbəsinin rəhbəri Vüqar Cəfərov, “CAVAN Gənclər Hərəkatı”nın icraçı direktoru Ənvər İsmayılzadə, “Baku Design Academy”nin  təsisçisi Aysel Gülməmmədova, turizm bloqeri Həvva Səfərova və mədəniyyət xadimi Cavid Şahbazbəyov tələbələrlə öz təcrübələrini paylaşıblar.

Konfransdan sonra tədbir konsert proqramı ilə davam edib. Səhnədə universitet tələbələri və məzunları ilə yanaşı, tanınmış musiqi ifaçıları çıxış ediblər.

Gənclərə açıq formatda keçirilən  tədbirdə təxminən 300-ə yaxın tələbə iştirakçı olub.

“Nosart Konfrans və Konsert” layihəsi Xəzər Universitetinin Musiqi Klubu tərəfindən tələbələr üçün maarifləndirici və mədəni platforma kimi müxtəlif konsert və sərgi formatlı tədbirlərlə həyata  keçirilir.