Xəzər Universiteti Tarix və arxeologiya departamentinin müdiri Dos. Telman Nüsrətoğlu 2026-cı il iyunun 1- də  Azərbaycan televiziya kanallarında yayımlanan ictimai-siyasi və analitik proqramlarda beynəlxalq münasibətlərə dair aktual mövzularla bağlı çıxışlar edib.

 Telman Nüsrətoğlu AzTV-nin “Hədəf” analitik proqramında, ARB 24-ün “Gündəm” proqramında və Baku TV-nin “Aktual Gündəm” verilişində iştirak edərək, Amerika Birləşmiş Ştatları ilə İran arasında münasibətlərin mövcud vəziyyəti, Yaxın Şərqdə baş verən geosiyasi proseslər, bölgədə artan gərginliyin regional təhlükəsizlik mühitinə təsirləri və beynəlxalq münasibətlərin digər mühüm istiqamətləri barədə geniş təhlillər təqdim edib.

Çıxışlarında departament müdiri Yaxın Şərqdə formalaşan yeni siyasi və təhlükəsizlik reallıqlarını, İran-ABŞ münasibətlərinin gələcək perspektivlərini, İsrail amilinin regional proseslərdəki rolunu, eləcə də baş verən hadisələrin Azərbaycan və Cənubi Qafqaz üçün mümkün nəticələrini elmi və analitik yanaşma ilə dəyərləndirib.

Telman Nüsrətoğlu mütəmadi olaraq, yerli və beynəlxalq media platformalarında çıxış edərək, tarix, geopolitika, beynəlxalq münasibətlər və Türk dünyası ilə bağlı məsələlərə dair ekspert rəylərini ictimaiyyətlə bölüşür.