Xəzər Universitetində 2026- cı il mayın 26 - da Əməkdar jurnalist, uzun illər “XəzərXəbər” jurnalında baş redaktor müavını  vəzifəsində çalışmış Əlirza Balayevin işdən ayrılmağı ilə əlaqədar yolasalma tədbiri keçirilib.

Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı Əlirza Balayevin jurnaldakı fəaliyyətini yüksək qiymətləndirərək, onun peşəkarlığını, “XəzərXəbər”in hazırkı səviyyəyə çatdırılması, sayılıb- seçilən bir dərgiyə çevrilməsi üçün xüsusi əməyi olduğunu qeyd edib. Ə. Balayevə gələcək həyatında və yaradıcılığında uğurlar arzulayan H. İsaxanlı ümidvar olduğunu bildirib ki, doğma universitetlə əlaqələrini bundan sonra da davam etdirəcək.

Xəzər Universitetinin rektoru Dr. Raziyə İsayeva Əlirza Balayevin jurnalın baş redaktor müavini kimi universitetin inkişafına verdiyi töhfələri  qeyd edib və xüsusi vurğulayıb ki, Əlirza müəllimin tələbkarlığı da əməkdaşlarla yaradıcı münasibətdə önəmli rol oynayıb.

Tədbirdə iştirak edənlərdən Təbiət elmləri və mühəndislik fakültəsinin dekanı Fəxrəndə Əfəndiyeva, Humanitar təhsil və sosial elmlər fakültəsinin dekanı Milana Abbasova, Təbiət elmləri, sənət və texnologiya yüksək təhsil fakültəsinin dekanı Günel Bahəddinova, Keyfiyyətin Təminatı Mərkəzinin rəhbəri Lyudmila Sotova, “XəzərXəbər”in əməkdaşlarından Əfruz Fərzəliyeva və Telman Nəzərli Əlirza Balayevə xoş arzularını bildirib, onunla bağlı xatirələrini bölüşüblər.

Əməkdar jurnalist Əlirza Balayev tədbirin təşkilinə görə, universitet rəhbərliyinə təşəkkürünü bildirib, Xəzər Universitetini həmişə ehtiramla xatırlayacağını, bu təhsil ocağını öz doğma ocağı sayacağını xüsusi vurğulayıb.

Tədbirin sonunda Xəzər Universitetinin rektoru Dr. Raziyə İsayeva uzunmüddətli və səmərəli fəaliyyətinə görə, Əlirza Balayevə universitet adından hədiyyə təqdim edib.