Xəzər Universitetinin Siyasi elmlər və fəlsəfə departamentinin müəllimi Rahil Dadaşlı 2026-cı il mayın 2-dən 23-dək ABŞ-da səfərdə olmuşdur. Səfər ABŞ Dövlət Departamenti tərəfindən maliyyələşdirilən və təşkil edilən peşəkar mübadilə proqramı IVLP (Beynəlxalq Ziyarətçilərin Liderlik Proqramı) çərçivəsində həyata keçirilmişdir. Bu proqramın məqsədi ziyarətçilərə ABŞ ilə bağlı müxtəlif mövzularda qısamüddətli peşəkar mübadilə təşkil etməkdir. Budəfəki mövzu isə ABŞ–Avropa İttifaqı təhlükəsizlik məsələlərinə həsr edilmişdi.

Səfərin ilk dayanacağı ABŞ müstəqilliyinin 250 illiyinə hazırlıqlar fonunda paytaxt Vaşinqton DC şəhəri idi.  Bu zaman çərçivəsində Rahil Dadaşlı Müdafiə Nazirliyində olmuş, habelə, Dövlət Departamentinin rəsmiləri ilə birgə nahar yeməyində iştirak etmişdir. Sonra mütəxəssislər tərəfindən təşkil olunan ABŞ-da federalizm, dövlət quruluşu və siyasi sistem barədə vorkşopa qatılmışdır. Ümumilikdə Ağ Ev, Konqres binası, Koreya müharibəsi və Linkoln memorialları, Vyetnam müharibəsi memorialı və digər mədəni-ictimai məkanlar ziyarət olunan yerlər arasındadır.

Səfərin ikinci dayanacağı Kaliforniya ştatının San Dieqo şəhəri. Bu mərhələnin məqsədi ABŞ-ın sərhədlərdən gələn təhlükəni necə idarə etməsi, sərhəd divarı, xüsusi sərhəd keçid məntəqələri və San Dieqo–Tixuana şəhərləri arasında keçidin nizamlanması və digər məsələlərin işıqlandırılması olmuşdur. Proqram San Dieqo mərkəzli San Diego Diplomacy Council tərəfindən hazırlanmış və həyata keçirilmişdir. Peşəkar görüşlər çərçivəsində regional iş mühitini və araşdırmaçıları əlaqələndirən World Trade Center San Diego mərkəzidir. 

Sonra İsveç sənaye şirkəti Saab tərəfindən qurulan Skapa şirkətinin direktoru patrul qayıqlarında Sİ istifadəsi və avtonom sistemlərin quruluşu barədə ziyarətçilərə məlumat vermişdir. Sonuncu görüşlər isə General Atomics şirkətinin nümayəndəsi və akademik Vitse-Admiral Charles Martoglionun Atlantik və İndo-Pasifik regionunda baş verən geosiyasi hadisələr barədə master-klası ilə yekunlaşmışdır. Bunlardan əlavə, San Dieqo–Tixuana keçid mərkəzinə sahə ekspedisiyası təşkil edilmişdir.

Üçüncü ziyarətin ünvanı Nebraska ştatı və onun paytaxtı Linkoln və Omaha şəhərləridir. Bu səfər çərçivəsində ərzaq təhlükəsizliyi və strateji idarəetmə məsələləri müzakirə olunmuşdur. Bu müddət ərzində USSTRATCOM, Nebraska Senatı ziyarət edilmiş, ştatın tarixi, həmçinin, ABŞ strateji qoşunlarının tarixi diqqət çəkmişdir. Senatda bəzi ştat rəsmiləri və senatorlarla qarşılıqlı fikir mübadiləsi aparılmışdır.

Sonuncu və dördüncü dayanacaq isə Kolorado ştatının Kolorado Sprinqs şəhəri olmuşdur. Bu səfər zamanı Kolorado Universitetində bəzi görüşlər keçirilmiş, Sİ və onun müdafiə, habelə, fəza sahəsinə tətbiqi ilə bağlı keyslər müzakirə edilmişdir. Həmin universitetin əməkdaşı Stiv Rekka transmilli ekstremizmin qarşısının alınması və daxili təhlükəsizliyin qorunmasının akademik araşdırmalardakı əksi ilə bağlı vorkşop təşkil etmişdir.

Görüşlərdən əlavə, hər bir ştatda mədəni tədbirlərdə, idman yarışlarında iştirak edilmiş, həmçinin, Garden of the Gods və digər milli parklar ziyarət olunmuşdur.

Rahil Dadaşlıya ABŞ Dövlət Departamentinin proqram məzunu olduğunu təsdiq edən sertifikat verilmişdir.