Xəzər Universiteti Təbiət elmləri, sənət və texnologiya yüksək təhsil fakültəsi və Neft mühəndisliyi departamentinin təşkilatçılığı ilə doktorant Sərvər Məmmədovun 2026-cı il mayın 25-də “Reyn qrabenindən çıxarılan oolit əhəngdaşlarının keçiriciliyinə stressin təsiri” mövzusunda seminarı keçirilib.

Məruzəçi “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində Azərbaycan Respublikası Elm və Təhsil Nazirliyi və Xəzər Universiteti ilə üçtərəfli müqavilə əsasında Fransanın Strasburq Universitetində “Yer, ətraf mühit və geofiziki elmlər” ixtisası üzrə doktorantura təhsili alır.

Seminar zamanı tələbələr geotermal rezervuarların xarakterizasiyası üçün süxur mexanikasının əsas prinsipləri ilə tanış olublar. Təqdimatda Fransanın geotermal enerji baxımından böyük əhəmiyyət daşıyan regionlarından biri olan Yuxarı Reyn Qrabenindəki əhəngdaşlarında məsaməliliyin, sementləşmənin və effektiv təzyiqin süxurların mexaniki davranışına və maye axını xüsusiyyətlərinə təsiri müzakirə edilib. Oolitli əhəngdaşları üzərində yüksək təzyiq şəraitində aparılmış deformasiya eksperimentlərinin yeni nəticələri təqdim olunub, fərqli deformasiya rejimləri zamanı keçiriciliyin təkamülü göstərilib.  Həmçinin, doktorant seminarda süxurun mikrostrukturu, deformasiya prosesləri və rezervuar məhsuldarlığı arasındakı əlaqələrin anlaşılması baxımından ətraflı  məlumat verib.