Xəzər Universiteti Təbiət elmləri, sənət və texnologiya yüksək təhsil fakültəsi və Neft mühəndisliyi departamentinin təşkilatçılığı ilə doktorant Turqut Əhmədovun 2026-cı il mayın 23-də “Axın simulyasiyası üçün geoloji və rezervuar modellərində adaptiv və mürəkkəb strukturlu şəbəkələrin qurulması və miqyasının böyüdülməsi metodlarının işlənməsi və tətbiqi” mövzusunda seminarı keçirilib.

Məruzəçi “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyini artırılması üzrə Dövlət Proqramı” çərçivəsində Azərbaycan Respublikası Elm və Təhsil Nazirliyi və Xəzər Universiteti ilə üçtərəfli müqavilə əsasında Amerika Birləşmiş Ştatlarının Texas ştatında yerləşən Texas A&M Universitetində “Neft-qaz Mühəndisliyi” ixtisası üzrə doktorantura təhsili alır.

Seminarda axın simulyasiyası üçün geoloji və rezervuar modellərində adaptiv və mürəkkəb strukturlu şəbəkələrin qurulması və miqyasının böyüdülməsi metodlarının işlənməsi və tətbiqi təqdim olunub. Təqdimatda model ölçüsünü və hesablama xərclərini azaltmaqla yanaşı, mühüm axın xüsusiyyətlərini və geoloji strukturları qoruyan böyük miqyaslı şəbəkə dizaynlarının hazırlanması nümayiş etdirilib. Xüsusi olaraq faza həcmlərinin və maye kontaktlarının, faylı şəbəkə bloklarının, qeyri-qonşu əlaqələrin, akvifer əlaqələrinin və quyu yaxınlığındakı şəbəkə dəqiqliyinin qorunmasına diqqət yetirilib. Seminarda həmçinin, axın əsaslı transmissibilik və quyu əlaqələrinin miqyas böyüdülməsi yanaşmalarının Kartezian şəbəkə elementlərinə tətbiqi müzakirə olunub və bu metodların mürəkkəb rezervuar sistemlərində axın davranışının düzgün təsvir edilməsi və rezervuar simulyasiyasının səmərəliliyinin artırılmasındakı rolu vurğulanıb.