Erasmus+ mübadilə proqramı çərçivəsində Türkiyənin Hasan Kalyoncu və Qazi Universitetlərindən 3 nəfərlik akademik heyət 2026-cı il mayın 18- də   Xəzər Universitetində olub.  

Mobilliyin ilk günü qonaqlar üçün Xəzər Universitetinin Təbiət elmləri, sənət və texnologiya yüksək təhsil fakültəsi, İqtisadiyyat və menecment fakültəsi, həmçinin, Beynəlxalq əlaqələr şöbəsinin əməkdaşları ilə görüş təşkil olunub. Görüş zamanı Xəzər Universiteti haqqında ətraflı təqdimat keçirilib, ali təhsil sahəsində beynəlxalq əməkdaşlıq imkanları, akademik təcrübə mübadiləsi və gələcək birgə fəaliyyət perspektivləri müzakirə edilib.

Səfər çərçivəsində akademik heyət üzvləri öz ixtisas sahələrinə uyğun olaraq, müxtəlif fakültələrdə dərslərə cəlb olunublar və tələbələrlə interaktiv görüşlər keçiriblər. Mobillik müddətində tərəflər arasında akademik əlaqələrin genişləndirilməsi, gələcək layihələr və Erasmus+ proqramı çərçivəsində əməkdaşlığın inkişaf etdirilməsi istiqamətində fikir mübadiləsi aparılıb.

Mobilliyin sonunda qonaqlara Xəzər Universiteti tərəfindən sertifikatlar və xatirə hədiyyələri təqdim olunub.