Xəzər Universiteti Təbiət elmləri, sənət və texnologiya yüksək təhsil fakültəsi və Tarix və arxeologiya departamentinin təşkilatçılığı ilə 2026-cı il mayın 13-də doktorant Alim Nəsirovun “Şah I İsmayıl dövründə İspaniya ilə ittifaq arayışları” mövzusunda seminarı keçirilib.

Məruzəçi “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində Azərbaycan Respublikası Elm və Təhsil Nazirliyi və Xəzər Universiteti ilə üçtərəfli müqavilə əsasında Türkiyənin İstanbul Universitetində “Yeni Dövr Tarixi” ixtisası üzrə doktorantura təhsili alır.

Seminarda XVI əsrin əvvəllərində Səfəvilər dövləti ilə İspaniya arasında Osmanlı imperiyasına qarşı formalaşdırılmağa çalışılan diplomatik münasibətlərdən bəhs olunub. Təqdimatda Şah I İsmayılın Avropa dövlətləri, xüsusilə, İspaniya kralı V Karl ilə əlaqələr quraraq, Osmanlılara qarşı ortaq hərbi ittifaq yaratmaq cəhdləri izah edilib. Diplomatik yazışmaların və elçi missiyalarının həyata keçirilməsində Petrus de Monte Libano və İohan Balbi kimi vasitəçilərin mühüm rolu vurğulanıb. Seminar zamanı erkən yeni dövr diplomatiyasında rabitə və kommunikasiya imkanlarının zəifliyi səbəbindən məktubların gec çatdırılması və siyasi planların aktuallığını itirməsi məsələləri də  müzakirə edilib. Həmçinin, coğrafi, texnoloji və siyasi maneələrin Səfəvi–İspan münasibətlərinin real hərbi ittifaqa çevrilməsinə imkan vermədiyi qeyd olunub. Seminar iştirakçılarına dövrün beynəlxalq münasibətlər sistemi və diplomatik əlaqələrinin xüsusiyyətləri haqqında ətraflı məlumat verilib.