Xəzər Universiteti Təbiət elmləri, sənət və texnologiya yüksək təhsil fakültəsi və Coğrafiya və ətraf mühit departamentinin təşkilatçılığı ilə doktorant Nurtac Süleymanzadənin 2026-cı il mayın 19-da “Geospatial AI və turizm axınlarının prediktiv modelləşdirilməsi” mövzusunda seminarı keçirilib.

Məruzəçi “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyini artırılması üzrə Dövlət Proqramı” çərçivəsində Azərbaycan Respublikası Elm və Təhsil Nazirliyi və Xəzər Universiteti ilə bağlanmış üçtərəfli müqavilə əsasında Türkiyənin İstanbul Universitetində Coğrafiya  ixtisası üzrə doktorantura təhsili alır.

Seminarda süni intellekt texnologiyalarının coğrafiya və məkan verilənləri ilə inteqrasiyası, geospatial analizlərin müasir turizm sistemlərində rolu, turist davranışlarının data əsaslı təhlili və prediktiv modelləşdirmə yanaşmaları geniş şəkildə müzakirə olunub.

Seminar zamanı AI, geodata, avtomatlaşdırma və davranış analizi vasitəsilə turizm axınlarının necə proqnozlaşdırıla biləcəyi real nümunələr əsasında tələbələrə izah edilib. Təqdimatda geodata və süni intellektin praktiki tətbiq imkanları, turizm sahəsində davranış analizi və data əsaslı qərarvermə metodları, geospatial texnologiyalar vasitəsilə innovativ layihələrin qurulması, AI ilə sistem düşüncəsinin və avtomatlaşdırmanın əhəmiyyəti, məlumatın iqtisadi dəyərə və məhsula çevrilməsi yolları haqqında ətraflı məlumat verilib.

Seminarın əsas məqsədi tələbələrdə innovativ, məqsədyönümlü və sistem əsaslı düşüncə formalaşdırmaq, onları müasir texnologiyaların coğrafiya və turizm sahəsində tətbiqi ilə tanış etmək olub. Təqdimatda xüsusi olaraq vurğulanıb ki, gələcəyin coğrafiya mütəxəssisləri yalnız xəritə və statistik analizlə kifayətlənməyəcək, eyni zamanda süni intellekt, data analitikası və prediktiv modelləşdirmə sistemləri ilə işləyən multidissiplinar mütəxəssislərə çevriləcəklər.