Xəzər Universiteti Təbiət elmləri, sənət və texnologiya yüksək təhsil fakültəsi və Neft mühəndisliyi departamentinin təşkilatçılığı ilə doktorant Nicat Qasımlının 2026-ci il mayın 12-də “Səthi aktiv maddənin vurulmasında optimal duzluluğun təyini üçün yeni modelləşdirmə yanaşmaları” mövzusunda seminarı keçirilib.

Məruzəçi “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyini artırılması üzrə Dövlət Proqramı” çərçivəsində AzərbaycanRespublikası Elm və Təhsil Nazirliyi və Xəzər Universiteti ilə üçtərəfli müqavilə əsasında Amerika Birləşmiş Ştatlarının Pensilvaniya Dövlət Universitetində “Enerji və mineral mühəndisliyi” ixtisası üzrə doktorantura təhsili alır.

Seminarda neft hasilatının maksimum səviyyəyə çatdırılması məqsədilə optimal duzluluğun modelləşdirilməsi və müəyyənləşdirilməsi üzrə mövcud yanaşmalar, eləcə də bu sahədə tətbiq olunan yeni metodlar ətraflı şəkildə təqdim olunub. Təqdimatın əsas məqsədi surfaktantlarla neft hasilatının artırılması prosesinin layihələndirilməsi zamanı optimal duzluluğun dəqiq təyin edilməsinin əhəmiyyətini diqqətə çatdırmaq idi. Seminar çərçivəsində müxtəlif modellərin işləmə prinsipləri, tətbiq imkanları, üstünlükləri və məhdudiyyətləri geniş şəkildə müzakirə edilib.

Seminar “Neft hasilatının artırılması üsulları” və “Neft hasilatının artırılması tətbiqləri ilə lay mühəndisliyi” fənlərini öyrənən tələbələr üçün xüsusilə faydalı olub, eksperimental müşahidələrin etibarlı riyazi modellərlə ifadə edilməsinin neft mühəndisliyi sahəsində mühüm rol oynadığını ifadə edib.