Xəzər Universitetinin Həyat elmləri departamenti, Memarlıq və dizayn departamentinin birgə təşkilatçılığı ilə 2026-cı il mayın 15-də universitetin 35 illik yubileyinə həsr olunmuş “Dənizkənarı sahədən tullantıların toplanması və onlardan sərgi kollajlarının hazırlanması” adlı ekoloji aksiya keçirilib. Tədbirin məqsədi tələbələr arasında ekoloji maarifləndirmənin gücləndirilməsi, dənizkənarı ərazilərin mühafizəsinə dəstək göstərilməsi və yaradıcı yanaşmalar vasitəsilə tullantılara yeni baxış formalaşdırılmasıdır.

Aksiya Buzovna çimərliyi ərazisində təşkil olunub. Tədbirdə  Biologiya  müəllimliyi, həmçinin,  Kimya və biologiya müəllimliyi  ixtisasları üzrə təhsil alan 2-ci kurs tələbələri iştirak ediblər.

Dəniz sahilindən plastik, şüşə, kağız, qamış və digər müxtəlif növ tullantılar toplanaraq, ərazi  təmizlənib. Toplanan tullantıların bəziləri sərgi kollajlarının hazırlanması üçün nəzərdə tutulub.

Aksiyada Həyat elmləri departamentinin müdiri  Dr. Cəmalə Eldarova, departamentin müəllimi Gülafət Şəfiyeva, həmçinin, Memarlıq və dizayn departamentinin müəllimi İsgəndər Məmmədov da iştirak ediblər. Tədbir iştirakçıları ekoloji problemlərə diqqətin artırılmasının, ətraf mühitin qorunmasının  və tullantıların təkrar istifadəsinin təşviq edilməsinin vacibliyini vurğulayıblar.

Bu təşəbbüs “Dünya Şəhərsalma Forumu 13” çərçivəsində ön plana çıxarılan dayanıqlı şəhərlər, ekoloji məsuliyyət və tullantıların idarə olunması kimi qlobal prioritetlərlə də uyğunluq təşkil edir.