Xəzər Universitetinin Psixologiya departamentinin əməkdaşı və Xəzər Psixoloji Xidmət Mərkəzinin psixoloqu Mirsadiq Muxtarov 2026-cı il aprelin 10-da "Asılılığın psixologiyası" mövzusunda tələbələrə maarifləndirici və psixoprofilaktik seminar keçib. Seminarın əsas məqsədi yalnız diqqəti maddə asılılığının zərərlərinə yönəltmək deyil, eyni zamanda, gənclərdə bu mövzu ilə bağlı dərin anlayış formalaşdırmaq, onların risk faktorlarını düzgün qiymətləndirmə bacarıqlarını inkişaf etdirmək və sağlam həyat tərzinə yönəltmək olub.

Seminarda tələbələrə asılılığın fərdi və ictimai səviyyədə yaratdığı fəsadlar ətraflı şəkildə izah edilib, erkən müdaxilənin və profilaktikanın əhəmiyyəti xüsusi vurğulanıb. Seminar, həmçinin, gənclərin psixoloji dayanıqlılığının artırılması, stresslə mübarizə üsullarının öyrədilməsi və düzgün qərarvermə bacarıqlarının inkişaf etdirilməsi baxımından əhəmiyyət kəsb edib .

Mirsadiq Muxtarov maddə asılılığı anlayışına toxunaraq, bu problemin fərqli amillərini, habelə, bioloji, psixoloji və sosial faktorların təsirini izah edib. Bununla yanaşı, seminar zamanı asılılığın yaranma səbəbləri, onun müalicə yolları və bu mövzuda müasir yanaşmalar geniş müzakirə olunub. Seminarda maddə asılılığının yalnız bir insanın psixoloji problemi deyil, həmçinin, cəmiyyətin müxtəlif səviyyələrinə təsir edən genişmiqyaslı bir məsələ olduğu  bildirilib. Asılılığın müalicəsində fərqli terapiya növlərinin, həmçinin, ailə və sosial dəstəyin əhəmiyyəti vurğulanıb.