Xəzər Universiteti Psixologiya departamentinin əməkdaşı, Xəzər Psixoloji Xidmət Mərkəzinin psixoloqu Mirsadiq Muxtarov 2026-cı il mayın 15-də “Redaktor.az” xəbər portalına müsahibə verib. Psixoloq qısa video platformalarının insan psixologiyasına təsiri, diqqət mexanizmləri və sosial media istifadəsinin yaratdığı psixoloji nəticələr barədə fikirlərini bölüşüb.

Psixoloq qeyd edib ki, “TikTok”, “Instagram Reels” və “YouTube Shorts” kimi qısa video platformaları insanların diqqət və fokuslanma qabiliyyətinə ciddi təsir göstərə bilir. Onun sözlərinə görə, davamlı şəkildə sürətli və dəyişkən məzmunlara sahiblənmək  insan beynini qısa müddətli stimullara uyğunlaşdırır və uzunmüddətli diqqətin qorunmasını çətinləşdirir.   Mirsadiq Muxtarov bildirib ki, qısa video platformaları daha çox bölünmüş diqqəti aktivləşdirir və bu vəziyyət uzun müddət davam etdikdə akademik fəaliyyətlər zamanı diqqətin tez dağılması ilə nəticələnə bilər. O vurğulayıb ki, xüsusilə gənclər və yeniyetmələr bu təsirlərə daha həssasdırlar, çünki onların beynində qərarvermə və davranışa nəzarət edən prefrontal korteks inkişaf mərhələsində olur.

Psixoloq, həmçinin, qeyd edib ki, qısa video platformalarının həddindən artıq və nəzarətsiz istifadəsi müəyyən hallarda davranış asılılığına bənzər mexanizmlər yarada bilir. Onun sözlərinə görə, bu platformalar beynin mükafat sistemi ilə əlaqəli işləyərək insanlarda davamlı gözlənti hissi formalaşdırır və uzunmüddətli istifadə zamanı diqqət dağınıqlığı, emosional yorğunluq və koqnitiv yüklənmə kimi hallar müşahidə oluna bilər. Mirsadiq Muxtarov əlavə edib ki, xüsusilə gecə saatlarında qısa video istifadəsi yuxu keyfiyyətinə də mənfi təsir göstərir.  O bildirib ki, sürətli və intensiv informasiya axını beynin sakitləşməsinə mane olaraq, yuxu pozuntuları, səhər yorğunluğu və gün ərzində diqqət zəifliyi yaradır.

Müsahibənin tam versiyası aşağıdakı linkdə:

https://redaktor.az/news/social/327086-qisa-videolar-asililiq-yarada-biler