AMEA Arxeologiya və Antropologiya İnstitutu və Milli Azərbaycan Tarixi Muzeyinin birgə təşkilatçılığı ilə 2026-cı il mayın 15- də  “18 May – Beynəlxalq Muzeylər Günü”nə həsr olunmuş “Rəqəmsallaşdırma kontekstində mədəni irsin qorunması və tədqiqi” mövzusunda seminar keçirilmişdir.

Milli Azərbaycan Tarixi Muzeyinin elmi katibi, Dos. Sevinc Nəsirova muzeylərin rəqəmsal transformasiyasının əhəmiyyətindən danışmış, müasir texnologiyaların ekspozisiya və elmi tədqiqat sahəsində yaratdığı imkanları vurğulamışdır. Sonra  AAİ-nin ümumi işlər üzrə direktor müavini, Dos. Şövqü Həsənov rəqəmsal humanitar elmlərin inkişafının mədəni irsin qorunmasında mühüm rol oynadığını qeyd etmişdir.

Seminarın akademik hissəsində AAİ-nin Elmi ekspozisiyanın təşkili şöbəsinin böyük elmi işçisi, Azərbaycan Dövlət Mədəniyyət və İncəsənət Universitetinin Təsviri sənət tarixi və nəzəriyyəsi kafedrasının professoru Məlahət Fərəcova açıq hava altında olan muzeylərdə rəqəmsal texnologiyaların tətbiqi və müasir ekspozisiya metodlarından bəhs etmişdir. AAİ-nin Arxeoloji abidələrin qeydiyyatı və pasportlaşdırılması şöbəsinin müdiri, Dos. Mikayıl Mustafayev  arxeoloji abidələrin rəqəmsal qeydiyyatı və elektron bazaların formalaşdırılması istiqamətində görülən işlər haqqında məlumat vermişdir.

Milli Azərbaycan Tarixi Muzeyinin böyük elmi işçisi, Dr. Aida İsmayılova və Xəzər Universitetinin Tarix və arxeologiya departamentinin müəllimi, Milli Azərbaycan Tarixi Muzeyinin elmi işçisi, Dr. Laçın Mustafayev çıxışlarında muzey fondlarının rəqəmsallaşdırılması, mədəni irsin tədqiqində innovativ yanaşmalar və müasir texnologiyaların tətbiqi ilə bağlı fikirlərini iştirakçılarla bölüşmüşlər.

Seminarın sonunda AAİ-nin Elmi ekspozisiyanın Təşkili şöbəsinin müdiri, Xəzər Universitetinin Tarix və arxeologiya departamentinin müəllimi Orxan Zamanov mövzu ilə bağlı çıxış etmişdir. Tədbirdə AAİ-nin aparıcı elmi işçisi, Xəzər Universitetinin Tarix və arxeologiya departamentinin müəllimi  Dr. Yaqub Məmmədov və Tarix müəllimliyi ixtisasının II kurs tələbələri də iştirak etmişlər.

Seminar çərçivəsində tələbələr üçün Hacı Zeynalabdin Tağıyevin ev-muzeyinə ekskursiya təşkil olunmuşdur. Ekskursiya zamanı bələdçi tərəfindən muzeyin tarixi, Hacı Zeynalabdin Tağıyevin həyatı və muzeydə qorunan eksponatlar haqqında ətraflı məlumat verilmişdir.

Ekskursiyanın sonunda bələdçinin təqdim etdiyi məlumatlar əsasında interaktiv test keçirilmişdir. Test interaktiv masa üzərində qruplar şəklində təşkil olunmuş, tələbələr komanda halında sualları cavablandıraraq, biliklərini yoxlamışlar.