Xəzər Universitetinin Fizika və elektronika departamentinin müdiri Dos.Fəridə Tatardar İspaniyanın UDC Ferrol Industrial Campus-da elmi fəaliyyət göstərməsi məqsədi ilə 2025-ci il sentyabr- noyabr aylarında  3 aylıq postdoc təcrübə keçmişdir. Bu dövrdə Fəridə Tatardar İspaniyada yerləşən A Coruna Universitetinin Ferrol Sənaye Kampusunda (UDC Ferrol Industrial Campus) postdoktoral tədqiqat fəaliyyəti çərçivəsində piezoelektrik və triboelektrik nanokompozitlər üzərində mühüm elmi işlər aparmışdır. Onun tədqiqatı əsasən 3D çap edilən nanokompozitlərin enerji yığımı (energy harvesting) xüsusiyyətlərinin artırılmasına yönəlmişdir. İşlər “Dəniz və Sənaye Texnologiyaları üzrə Tədqiqat Mərkəzinin Plastik Laboratoriyası” ında (Plastics Laboratory – Research Centre for Naval and Industrial Technologies laboratory) Prof. Dr. Ana Isabel Ares Pernas`ın rəhbərliyi altında həyata keçirilmışdır. Tədqiqat zamanı  sensorlar sonrakı mərhələdə piezoelektrik və triboelektrik enerji yığma sistemlərində sınaqdan keçirilmişdir. Bu işlər gələcəkdə çevik sensorlar və dayanıqlı enerji mənbələri üçün yeni imkanlar yarada bilər. Proqramın sonunda Fəridə Tatardar öz tədqiqat işi ilə bağlı seminar təqdim etmiş və tədqiqat fəaliyyətini uğurla tamamladığına dair sertifikatla təltif olunmuşdur.