Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin idarəetməsində olan “Keşikçidağ” Dövlət tarix‑mədəniyyət qoruğunun təşkilatçılığı və AMEA Arxeologiya və Antropologiya İnstitutunun aparıcı elmi işçisi, Xəzər Universiteti Tarix və arxeologiya departamentinin müəllimi Dr.Yaqub Məmmədovun iştirakı ilə 2026-cı il mayın 15- də  8 May – “Beynəlxalq Muzeylər Günü”nə həsr olunmuş onlayn elmi vebinar keçirilib.

“Keşikçidağın arxeoloji irsi və muzey dəyərləri” mövzusunda keçirilən vebinarda muzeylərin milli‑mədəni irsin qorunmasındakı rolu, Keşikçidağ abidə kompleksinin qədim yaşayış və ibadət məkanı kimi tarixi‑elmi əhəmiyyəti, həmçinin, bu ərazidə aparılan arxeoloji tədqiqatların nəticələrinin muzey ekspozisiyalarında əks olunması məsələləri müzakirə olunub.

Dr. Yaqub Məmmədov çıxışında muzeylərin cəmiyyətin tarixi yaddaşının formalaşmasında, elmi maarifləndirmə və mədəni irsin təbliğində oynadığı mühüm rolu qeyd edib.  

Vebinar çərçivəsində  Keşikçidağ qoruğunun arxeoloji tapıntılarının Azərbaycan arxeologiyası tarixində tutduğu yer, onların qorunması və gələcək nəsillərə çatdırılması istiqamətində görülən işlər barədə fikir mübadiləsi aparılıb, həmçinin, regionun arxeoloji abidələrinin tədqiqi və muzeyləşdirilməsi sahəsində müasir yanaşmalar, rəqəmsal texnologiyaların tətbiqi və elmi əməkdaşlığın genişləndirilməsi perspektivləri də müzakirə edilib.

Tədbirdə Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin idarəetməsində olan digər qoruqların əməkdaşları da iştirak ediblər.