Xəzər Universiteti Təbiət elmləri, sənət və texnologiya yüksək təhsil fakültəsi və Neft mühəndisliyi departamentinin təşkilatçılığı ilə doktorant Mürsəl Zeynallının 2026-cı il mayın 15-də “CO₂-nin geoloji saxlanması” mövzusunda seminarı keçirilib.

Məruzəçi “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində Azərbaycan Respublikası Elm və Təhsil Nazirliyi və Xəzər Universiteti ilə üçtərəfli müqavilə əsasında Birləşmiş Ərəb Əmirliklərinin Xəlifə Universitetində (Khalifa University) “Neft-qaz Mühəndisliyi” ixtisası üzrə doktorantura təhsili alır.

Seminarda CO₂-nin geoloji saxlanması istixana qazları emissiyalarının azaldılması və xalis sıfır emissiya hədəflərinə nail olunması baxımından mühüm həll yollarından biri olduğu bildirilib. Təqdimatda karbonun tutulması, saxlanması texnologiyasının əsas mərhələləri — CO₂-nin tutulması, daşınması, tükənmiş neft-qaz yataqları və ya dərin duzlu su layları kimi uyğun yeraltı geoloji strukturlara vurulması ətraflı şəkildə təhlil olunub. Həmçinin, CO₂-nin faza davranışı izah edilərək, superkritik vəziyyətdə olan CO₂-nin yeraltı saxlanma üçün daha səmərəli olduğu vurğulanıb. Ümumilikdə, qeyd edilib  ki, CO₂-nin uzunmüddətli və təhlükəsiz saxlanması geoloji mühitin bütövlüyündən, lay şəraitindən və saxlanma mexanizmlərinin düzgün qiymətləndirilməsindən asılıdır.