Xəzər Universitetinin İqtisadiyyat və menecment departamentinin təşkilatçılığı ilə 2026-cı il mayın 14-də “Süni intellekt, ağıllı iqtisadiyyat və rəqəmsal transformasiya şəraitində universitet-sənaye əməkdaşliğinin aktual məsələləri” mövzusunda elmi-praktik forum keçirildi. Forum ağıllı iqtisadiyyat, ağıllı logistika, ağıllı turizm, universitet-sənaye əməkdaşlığı və s. kimi aktual elmi istiqamətlərdə müxtəlif tədqiqatçıların elmi araşdırmalarının təqdimatı və müzakirəsi məqsədilə təşkil olunmuşdur.

Tədbir İqtisadiyyat və menecment  fakültəsinin dekan müavini Dr. Xanım Öməroğlunun açılış nitqi ilə başladı. Dr. Xanım Öməroğlu ilk öncə əsas məruzəçiləri, ekspertləri, tədbirdə iştirak edən departamentin akademik heyətini və tələbələri salamlayaraq, forumda iştiraklarına görə, təşəkkür etdi. Süni intellekt dövründə dəyişən rəqəmsal iqtisadiyyata həsr olunan forumun aktuallığına toxunaraq, xüsusilə, bu istiqamətdəki tədqiqatların ictimai müzakirəsinin təşkilini çox zəruri hesab etdi.

Hasan Kalyoncu Üniversitetinin müəllimi, Dr. Can Özcan süni intellekt şəraitində ağıllı logistikanın tətbiqi problemlərinə həsr olunmuş məruzə ilə çıxış etdi. Məruzəçi ağıllı iqtisadiyyat, ağıllı logistika, ağıllı gömrük, tək pəncərə sistemi, ağıllı limanlar və müasir şəraitdə rəqəmsallaşmanın logistik sistemlərə təsiri barədə geniş araşdırmasını təqdim etdi.

İqtisadiyyat və menecment departamentinin koordinatoru, turizm, dünya iqtisadiyyatı və iqtisadi coğrafiya üzrə tədqiqatçı Polad Orucovun   turizm 5.0 şəraitində turizm təhsilinin aktual problemləri mövzusunda maraqlı və aktual təqdimatı  oldu. Məruzəçi müasir turizmin inkişaf xüsusiyyətləri, müasir turizm təhsilinin əsas prinsipləri, süni intellekttin turizm praktikasına, turizm 5.0 çərçivəsində kadr hazırlığına, turizm tədqiqatlarına və müasir turizm təhsilinə mümkün təsirləri, həmçinin, imkanlar və risklər istiqamətində aktual məsələlərə toxundu. 

Sonda İqtisadiyyat və menecment departamentinin müəllimi Həsən Rəhimli müasir 3.0 universitet modelinin korporasiyalaşması və elmi tədqiqatların kommersiyalaşmasının siyasi-ideoloji və fəlsəfi-etik aspektləri mövzusunda çıxış etdi.

İnteraktiv üsulla keçirilmiş görüşdə məruzəçilər tələbələrin müxtəlif mövzularla ilə bağlı suallarını da cavabladılar.