Türkiyə Cümhuriyyətinin Ege Universitetində Ege Universiteti, Ankara Sosial Elmlər Universiteti və Marmara Universitetinin təşkilatçılığı ilə 2026-cı il aprelin 28-30-da  “Tarixöncəsi dövrlərdən Dəmir dövrünün sonuna qədər Şərqi Anadolu arxeologiyası” mövzusunda beynəlxalq konfrans keçirilib. 2019-cu ildə İzmir şəhərində (DARK I), 2021-ci ildə isə onlayn formatda (DARK II) keçirilmiş birinci və ikinci toplantının davamı olan DARK III, eyni dövrlük çərçivəsini qorumaqla yanaşı, qonşu bölgələri də əlavə edərək, Şərqi Anadoluda mövcud olmuş mədəniyyətlər daxil,  bütün mövzular üzrə çalışan tədqiqatçıları bir araya gətirməyi hədəfləyib.

Üç gün davam edən konfransda Türkiyə, Azərbaycan, Gürcüstan, Ermənistan, İran, ABŞ, Almaniya, Polşa, Fransa, Avstraliya və İtaliyadan olan arxeoloqların 30 məruzəsi dinlənilib. Qeyd etmək lazımdır ki, konfransın  xülasələri çap olunsa da, geniş məqalələrin DARK I və DARK II-də olduğu kimi,  SCOPUS indeksli nəşriyyatda dərc edilməsi  nəzərdə tutulur.

Konfransda AMEA Arxeologiya və Antropologiya İnstitutunun aparıcı elmi işçisi, Xəzər Universiteti Tarix və arxeologiya departamentinin müəllimi Dr.Yaqub Məmmədov “Azıx mağarası: Homo cinsinin üç fərqli növünə ev sahibliyi edən bənzərsiz bir sahə” adlı məruzə ilə çıxış edib. Yaqub Məmmədov 1960–1982-ci illərdə Məmmədəli Hüseynovun rəhbərliyi altında Azıx mağarasında aparılmış tədqiqatlardan, həmçinin, Qarabağ bölgəsi işğaldan azad olunduqdan sonra bərpa olunan yeni araşdırmalardan bəhs edib.  Əldə olunmuş nəticələr əsasında Azıx mağarasında üç fərqli insan növünün – Homo erectus, Homo heidelbergensis və Homo neanderthalensis – yaşadığı və bu xüsusiyyəti ilə unikal olduğu iştirakçıların diqqətinə çatdırılıb.

Konfransın son günü iştirakçıların İzmir şəhərində yerləşən, günümüzdən təxminən 8.500 il əvvələ – e.ə. 6500-cü illərə aid, Anadolu’nun ən qədim yaşayış məskənlərindən biri olan Yeşilova Neolit məskəninə (Yeşilova Höyüğü) səfəri təşkil olunub.