Xəzər Universiteti Siyasi elmlər və fəlsəfə departamentinin müdiri Dos. Orxan Vəliyevin 2026-cı il aprelin 10-da Bakı Dövlət Universitetində (BDU) “Azərbaycan kimliyinin əsası: yenən və yenilənən milli kimlik” mövzusunda seminarı keçirilib. Bu, Bakı Dövlət Universitetinin (BDU) Məzunlar Cəmiyyətinin təşkilatçılığı ilə keçirilən beşinci seminar olub.

Universitetin beynəlxalq əlaqələr üzrə prorektoru Şahin Pənahov BDU məzunlarının ölkənin ictimai-siyasi, iqtisadi, sosial, mədəni həyatında mühüm rol oynadıqlarını bildirib. Daha sonra prorektor seminar mövzusunun aktuallığına toxunaraq, müasir dövrdə milli kimlik, dövlətçilik və ictimai şüur məsələlərinin elmi baxımdan tədqiqinin xüsusi əhəmiyyət daşıdığını deyib.

BDU-nun Sosial elmlər və psixologiya fakültəsinin məzunu Dos. Orxan Vəliyev məruzəsində müasir Azərbaycan dövlətçiliyində milli kimlik anlayışının nəzəri əsaslarını və onun transformasiya prosesini geniş şəkildə təhlil edib. O qeyd edib ki, müasir dövrdə kimlik məsələsi yalnız etnik və tarixi çərçivədə deyil, həm də siyasi, sosial və institusional müstəvilərdə formalaşan çoxqatlı bir anlayış kimi çıxış edir.

Dos.O. Vəliyev diqqətə çatdırıb ki, Prezident İlham Əliyevin rəhbərliyi ilə Vətən müharibəsində tarixi Zəfərdən sonrakı dövrdə Azərbaycan cəmiyyəti yeni reallıqlar fonunda milli kimlik anlayışını yenidən dəyərləndirir. Bu mərhələdə kimlik artıq yalnız keçmişə bağlı deyil, gələcəyə yönələn strateji dəyər kimi formalaşır. 

O, millətin dövlətin tarixinin kollektiv yaddaşın qorunması və nəsillərarası identikliyin ötürülməsi baxımından əsas sütun olduğunu deyib. Coğrafiyanın isə Vətən anlayışının siyasi və mədəni məna kəsb etməsində mühüm amil olduğunu bildirib.

Seminarın sonunda tələbə və məzunların sualları cavablandırılıb, geniş fikir mübadiləsi aparılıb və mövzu ətrafında müxtəlif elmi yanaşmalar müzakirə edilib.

Seminar AZƏRTAC tərəfindən işıqlandırılıb.

Keçid: Bakı Dövlət Universiteti

BDU Məzunlar Cəmiyyətinin seminarı - Azərbaycan kimliyinin əsası: yenən və yenilənən milli kimlik - AZƏRTAC