Xəzər Universiteti Psixologiya departamentinin əməkdaşı və Xəzər Psixoloji Xidmət Mərkəzinin psixoloqu Mirsadiq Muxtarov Azərbaycan Respublikası Elm və Təhsil Nazirliyinin təşəbbüsü ilə həyata keçirilən “Tədqiqat Məktəbi: gənc alimlər üçün Beynəlxalq akademik mentorluq və tədqiqat proqramı” layihəsində iştirak hüququ qazanıb.

Layihə Elm və Təhsil Nazirliyinin “Elm və təhsil sahəsində ictimai təşəbbüslərin dəstəklənməsi” qrant müsabiqəsi çərçivəsində “İnnovativ İnkişafa Dəstək” İctimai Birliyi tərəfindən icra edilir. Proqrama ölkə üzrə 647 nəfər müraciət edib, seçim mərhələsinin nəticələrinə əsasən, yalnız 35 gənc alim iştirakçı seçilib.

Layihənin açılış mərasimi 2026-cı il aprelin 18-də Azərbaycan Texniki Universitetində keçirilib. Tədbirdə dövlət qurumlarının nümayəndələri, ali təhsil müəssisələrinin təmsilçiləri, ekspertlər və gənc tədqiqatçılar iştirak edib. Bildirilib ki, layihə gənc alimlərin elmi potensialının inkişafı, tədqiqat bacarıqlarının gücləndirilməsi və onların beynəlxalq elmi mühitə inteqrasiyası baxımından mühüm əhəmiyyət kəsb edir.

Proqram çərçivəsində iştirakçılar tədqiqat metodologiyası, akademik yazı, istinad sistemləri və elmi nəşr standartları üzrə intensiv təlimlərə cəlb olunacaqlar. Eyni zamanda, Türkiyə və Çin universitetlərindən cəlb ediləcək mütəxəssislərlə beynəlxalq mentorluq sessiyaları, seminarlar və ustad dərsləri təşkil ediləcək. Layihə iştirakçılarına elmi məqalələrin hazırlanması və nüfuzlu beynəlxalq (Q1/Q2 kateqoriyalı) jurnallarda nəşr olunması üçün metodiki dəstək göstərilməsi də nəzərdə tutulur.

Bu proqram gənc tədqiqatçıların yalnız nəzəri biliklərinin deyil, həm də praktiki elmi bacarıqlarının inkişafına, onların qlobal elmi platformalarda daha fəal iştirakına və akademik uğurlarının davamlılığının təmin edilməsinə xidmət edir.

https://muallim.edu.az/genc-alimler-ucun-tedqiqat-mektebi-layihesinin-acilis-tedbiri-kecirilib

https://turkic.world/az/articles/society/493429

https://voa.az/az/society/83125.html

https://azertag.az/xeber/genc_alimler_uchun_tedqiqat_mektebi_layihesine_baslanilib-4136355

https://azxeber.com/az/genc-alimler-ucun-tedqiqat-mektebi-layihesinin-acilis-tedbiri-kecirildi-fotolar/sosial/