2026-cı il aprelin 24-də Bakı Avrasiya Universiteti tərəfindən Birinci Türkoloji Qurultayın 100 illik yubileyinə həsr olunmuş “Azərbaycan ədəbiyyatşünaslığında türkoloji istiqamətlər” mövzusunda respublika elmi konfransı keçirilib. Xəzər Universitetinin Təbiət elmləri, sənət və texnologiya yüksək təhsil fakültəsinin Azərbaycan ədəbiyyatı ixtisası üzrə I kurs magistrantları Elvinə Kazımova və Əsmər Əliyeva konfransda iştirak ediblər.

Elvinə Kazımova “Məhəmməd Əsəd Bəyin “Şərqdə neft və qan” və Orxan Pamukun “Bəyaz qala” romanlarında Şərq-Qərb paralelliyi”, Əsmər Əliyeva “Çingiz Aytmatovun nəsrində müdrik qoca arxetipi (“Gün var əsrə bərabər” və “Ağ gəmi ”əsərləri əsasında)” mövzularında məruzə ilə çıxış ediblər. “Xəzər”in magistrantlarının çıxışı təşkilatçılar tərəfindən yüksək qiymətləndirilib.

     Hər iki məruzə magistrantların universitetdə dərs keçdikləri “Ümumtürk ədəbiyyatı” fənni çərçivəsində hazırlanıb. Məruzələrin hazırlanmasına magistrantların elmi rəhbərləri fil.e.d., Prof. Bədirxan Əhmədov, fil.e.d. Hikmət Quliyev və fənn müəllimi fil.e.d. Mehman Həsənli rəhbərlik ediblər.