Qazaxstanın Almatı şəhərində keçirilən“Study in Azerbaijan” beynəlxalq təhsil sərgisi uğurla başa çatıb.

2026-cı il aprelin 6-dan 8- dək keçirilən  tədbir Azərbaycan ali təhsil müəssisələrinin beynəlxalq səviyyədə tanıdılması və yeni əməkdaşlıqların qurulması baxımından mühüm əhəmiyyət daşıyır.

Sərgi çərçivəsində Qazaxıstan və Azərbaycan universitetlərinin rektorlarının II Forumu təşkil olunub. Forumda təhsil sahəsində əməkdaşlığın genişləndirilməsi, birgə layihələrin həyata keçirilməsi və akademik əlaqələrin möhkəmləndirilməsi müzakirə edilib, həmçinin, universitetlər arasında əməkdaşlıq sənədləri imzalanıb.

Tədbir müddətində Azərbaycan universitetlərinin stendləri ziyarətçilər tərəfindən böyük maraqla qarşılanıb.

Həmçinin, iştirakçılar üçün lotereya oyunu təşkil olunub. Lotereyanın nəticələrinə əsasən, iki tələbə Xəzər Universitetində təhsil haqqına 25 faiz güzəşt əldə edib.

Ümumilikdə, “Study in Azerbaijan” sərgisi Azərbaycan və Qazaxıstan arasında təhsil sahəsində əlaqələrin daha da inkişafına, tələbələr üçün yeni imkanların yaradılmasına və beynəlxalq akademik əməkdaşlığın genişlənməsinə mühüm töhfədir.