Xəzər Universitetində Drought Prevention Institute-un direktoru Laszlo Orlos və Macarıstanın Azərbaycandakı  səfirliyinin attaşesi  Daniel Brenner ilə 2026-cı il aprelin 1- də  görüş keçirilib. Görüşün məqsədi qazanılmış qrant çərçivəsində universitetin elmi-tədqiqat fəaliyyəti və Environmental Research Center-in fəaliyyəti ilə daha yaxından tanışlıq olub.

Görüşdə Xəzər Universitetinin təsisçisi, Direktorlar və Qəyyumlar Şurasının sədri  Prof.Akad.  Hamlet İsaxanlı, dekanlar, fakültə üzvləri, Environmental Research Center-in tədqiqatçıları iştirak edib, layihələri haqqında və tədqiqat mərkəzinin gələcəkdə planlaşdırılan fəaliyyəti barədə məlumat veriblər. Tərəflər arasında səmimi və məhsuldar müzakirələr aparılıb, qarşılıqlı əməkdaşlıq imkanları geniş şəkildə nəzərdən keçirilib.

Qazanılmış qrantın icra mexanizmləri, gözlənilən nəticələr və layihənin gələcək perspektivləri ətraflı şəkildə müzakirə olunub. Macarıstanın aparıcı universitetləri ilə əməkdaşlığın genişləndirilməsi, xüsusilə, ikili diplom proqramlarının yaradılması, tələbə və müəllim mübadiləsinin təşkili kimi mühüm məsələlər də diqqət mərkəzində olub.

Tərəflər, həmçinin, elmi-tədqiqat sahəsində birgə layihələrin həyata keçirilməsi, innovativ yanaşmaların tətbiqi və beynəlxalq təcrübə mübadiləsinin əhəmiyyətini vurğulayıblar. Bu istiqamətdə gələcəkdə daha sıx əməkdaşlığın qurulması və konkret addımların atılması ilə bağlı ilkin razılıqlar əldə edilib.

Xəzər Universitetinin beynəlxalq əlaqələrinin genişləndirilməsi və qlobal akademik şəbəkədə mövqeyinin gücləndirilməsi baxımından görüşün  mühüm əhəmiyyət kəsb etdiyi bildirilib.