Xəzər Universitetinin 35 illik yubiley tədbirləri çərçivəsində 2026- cı il martın 18-də  universitetin Mərmər zalında “Gələcəyin universiteti: tədqiqat, süni intellekt və innovasiyalar” mövzusunda rektorlar forumu keçirilib.Forumu giriş sözü ilə universitetin rektoru Dr. Raziyə İsayeva açaraq, qlobal ali təhsil sahəsində baş verən dəyişikliklərin müzakirə edilməsi, həmçinin, ali təhsilə süni zəkanın təsiri mövzusunun aktuallığını qeyd edib. Dr. R. İsayeva, həmçinin, bildirib ki, “Xəzər”in yubiley tədbirləri bütün il ərzində davam edəcək.

Xəzər Universitetinin qurucusu, Direktorlar və Qəyyumlar Şurasının sədri Prof.Akad. Hamlet İsaxanlı  iştirakçıları  salamlayaraq, forumun işinə uğurlar arzulayıb.Qeyd edib ki, belə müzakirələr ali təhsil sahəsində mövcud çətinliklərin, problemlərin aradan qaldırılması üçün ideyalar və təkliflər, eyni zamanda, birgə düşüncə baxımından çox faydalıdır. Ali təhsilin kütləviləşdirilməsinin müsbət hal olduğunu vurğulayan H. İsaxanlı bu kütləviliyin keyfiyyətə necə təsir etdiyini də unutmamağın vacibliyini bildirib. Unutmaq olmaz ki, süni zəka həyatı dəyişməyə başlayıb. Artıq çox şey ənənəvilikdən çıxır, buna görə  təhsil də yeni yanaşma, innovativ münasibət tələb edir.Türkiyənin Kütahya Dumlupınar Universitetinin rektoru Prof.Dr. Süleyman Kızıltoprak “Sosial elmlərin hibrid gələcəyi” mövzusunda məruzə edib.Sonra forum “Xəzər”in rektoru  Dr. Raziyə İsayevanın moderatorluğu ilə panel müzakirələrlə davam edb.Müzakirələrdə İbn Haldun Universitesinin rektoru Prof.Dr. Atilla Arkan, Almatı Menecment Universitetinin rektoru Dr. Assylbek Kozhakmetov, Gürcü- Amerika Universitetinin həmtəsisçisi və prezidenti Mikael Cowgill, Türk Dövlətləri Beynəlxalq Universitetinin rektoru Prof. Bahodir Turayev və Narxoz Universitetinin rektoru Kanat Kojaxmet çıxış ediblər.

Sonda iştirakçıların sualları cavablandırılıb.