Xəzər Universitetinin Karyera və Məzunlar Mərkəzinin təşkilatçılığı ilə 2026-cı il martın 16-da “Kreşendo” layihəsi çərçivəsində məlumatlandırıcı İnfoDesk təşkil olunmuşdur.

Görüşün əsas məqsədi tələbələri “Kreşendo” layihəsinin təqdim etdiyi imkanlar barədə məlumatlandırmaq, onların şəxsi və peşəkar inkişafına dəstək olmaq, eyni zamanda gənclərin karyera planlamasına töhfə vermək olub.

Görüş zamanı tələbələr layihə çərçivəsində təşkil olunan təlimlər, inkişaf proqramları, mentorluq imkanları və müxtəlif əməkdaşlıq perspektivləri ilə yaxından tanış olublar. Bununla yanaşı, iştirakçılara layihəyə qoşulma qaydaları, seçim mərhələləri və iştirak şərtləri haqqında də geniş məlumat təqdim edilib, sualları ətraflı şəkildə cavablandırılıb.

Təqdimat zamanı layihə rəhbəri İlahə Mərdanova, satış komandasının rəhbəri Turanə Vəliyeva, satış komandasının üzvləri Telli Yaqubova, Şəfa Mirzəyeva, Lamiyə Hüseyinova, Əli Axundov və marketinq komandasının üzvü Aytac Abdullayeva tələbələrə layihənin əsas fəaliyyət istiqamətləri, həyata keçirilən proqramlar və gələcək planlar haqqında ətraflı məlumat vermişlər.

İnfoDesk ərzində tələbələr fərdi şəkildə məsləhətlər almaq, öz maraq dairələrinə uyğun inkişaf imkanlarını müəyyənləşdirmək və gələcək karyera yolları ilə bağlı ilkin istiqamət formalaşdırmaq imkanı əldə ediblər. Bu cür birbaşa ünsiyyət mühiti gənclərin layihəyə olan marağını daha da artırıb.

Qeyd edək ki, “Kreşendo” layihəsi gənclərin potensialının üzə çıxarılması, onların bilik və bacarıqlarının inkişaf etdirilməsi, həmçinin əmək bazarına daha hazırlıqlı şəkildə inteqrasiya olunmalarına dəstək məqsədi daşıyır.