Xəzər Universitetinin Karyera və Məzunlar Mərkəzinin təşkilatçılığı ilə 2026-cı il martın 6-da AIESEC  Azərbaycan  təşkilatının  nümayəndələri ilə universitetin  Neftçilər, Nərimanov və  Bakıxanov  kampuslarında tələbələrin  görüşü keçirilib.  

Görüşdə tələbələr AIESEC tərəfindən təqdim olunan beynəlxalq proqramlar, gənclər üçün yaradılan inkişaf imkanları və xaricdə təcrübə proqramları haqqında ətraflı məlumat əldə ediblər.

Görüşün məqsədi tələbələrin liderlik bacarıqlarının inkişafına dəstək olmaq, onların fərdi və peşəkar inkişafını təşviq etmək, həmçinin, sosial layihələrdə iştirak və layihə idarəçiliyi sahəsində biliklərini artırmaq olub. Belə görüşlər tələbələrin karyera planlaşdırmasına da  kömək edir, onların qlobal əmək bazarı haqqında məlumatını artırır və beynəlxalq təcrübə imkanlarını genişləndirir.

Təqdimat çərçivəsində AIESEC Azərbaycan nümayəndələri tərəfindən “Global Volunteer”, “Global Teacher” və “Global Talent” proqramları haqqında da məlumat verilib.  Bildirilib ki, bu proqramlar gənclərə müxtəlif ölkələrdə təcrübə qazanmaq, fərqli mədəniyyətləri yaxından tanımaq və sosial layihələrdə iştirak etməklə,  cəmiyyətə töhfə vermək imkanı yaradır.

Tədbirdə  tələbələr üçün ilkin müraciət mərhələsi, seçim prosesi və iştirak qaydaları barədə də praktiki tövsiyələr təqdim olunub.

Layihə menecerləri Leyla Bayramova, Maral Əlizadə, Lamiyə Haqverdili, Cavid Ələsgərli, Zeynəb Babayeva proqramların məqsədi, müraciət şərtləri və iştirakçılar üçün yaradılan imkanlar barədə geniş məlumat verib, tələbələrin suallarını cavablandıriblar.