Bakı Şəhər Baş Polis İdarəsinin Yetkinlik Yaşına Çatmayanlarla Profilaktiki İşin Təşkili Bölməsinin (YYÇPİTB) təşkilatçılığı ilə 2026-cı il martın 10-da Bakının Yasamal rayonundakı 21 nömrəli tam orta məktəbdə “Narkomaniyaya yox deyək” mövzusunda maarifləndirici seminar keçirilib.

Xəzər Universitetinin Psixologiya departamentinin əməkdaşı,  Xəzər Psixoloji Xidmət Mərkəzinin psixoloqu Mirsadiq Muxtarov seminarda  maddə asılılığının formalaşmasına təsir edən amillər barədə ətraflı məlumat verib.Qeyd edib ki, asılılıq yalnız fərdin şəxsi zəifliyi ilə izah oluna bilməz, bu problem bioloji, psixoloji və sosial faktorların birgə təsiri nəticəsində yaranır. Psixoloqun sözlərinə görə, uşaqlıq dövründə yaşanan travmatik hadisələr, valideyn nəzarətinin yetərsizliyi, ailə daxilindəki gərgin münasibətlər və emosional diqqətsizlik gələcəkdə asılılıq riskini artıran əsas amillərdən hesab olunur. Bununla yanaşı, aşağı özünəqiymət, depressiv əhval-ruhiyyə, təşviş halları və streslə düzgün mübarizə bacarıqlarının olmaması da bu prosesə təsir edən  psixoloji amillər  kimi qeyd edilib. Həmçinin,  vurğulanıb ki, asılılıq hallarının qarşısının alınmasında erkən mərhələdə aşkaretmə, psixoloji dəstək proqramlarının təşkili, valideynlərin maarifləndirilməsi və təhsil müəssisələrində profilaktik tədbirlərin gücləndirilməsi böyük əhəmiyyət daşıyır. Sağlam sosial mühitin yaradılması və gənclərə streslə düzgün  üsullarla mübarizə bacarıqlarının aşılanması bu sahədə əsas istiqamətlərdən biri kimi göstərilib.

Tədbirdə Bakı Şəhər Baş Polis İdarəsinin Yetkinlik yaşına çatmayanlarla profilaktiki işin təşkili bölməsinin rəisi, polis polkovniki İbrahim İsmayılov, həmin bölmənin inspektoru polis baş leytenantı Aysel Hacıyeva, Yasamal RPİ-nin YYÇPİTB-nin rəisi polis polkovnik-leytenantı Nəbi Nəcəfov, Bakı Narkoloji Mərkəzin sosioloqu Fidan Ataxanlı iştirak ediblər.

Tədbirdə  mövzu ətrafında geniş fikir mübadiləsi aparılıb  və suallar cavablandırılıb.